FLASH
Shkruar nga Pamfleti
Policia e Kukësit ka arrestuar 52-vjeçarin Flamur Aliaj, një person i shpallur në kërkim pasi dyshohet se është bashkëposedues i 1 kilogrami lënde eksplozive, 6 kilogramëve kannabis sativa dhe një sasie municioni luftarak.
Lënda eksplozive, droga dhe municioni u gjetën nga Policia, më datë 20 korrik 2022, si rezultat i operacionit “Cooperation”. Gjatë tij u arrestuan vëllai i 52-vjeçarit dhe një 36-vjeçar, bashkëpunëtorë në këto veprimtari kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
“Si rezultat i kontrolleve të mbështetura te informacionet nga inteligjenca policore, të siguruara në vijim të megaoperacionit “Sundimi i ligjit”, specialistët për Hetimin e Krimeve të Komisariatit të Policisë Kukës lokalizuan, kapën dhe vunë në pranga shtetasin F. A., 52 vjeç, banues në fshatin Brekije.
52-vjeçari ishte shpallur në kërkim, pasi akuzohet se posedonte bashkë me vëllanë e tij, shtetasin P. A. dhe me shtetasin F. K., të dy të arrestuar nga Policia, në kuadër të operacionit “Cooperation”, më datë 20 korrik 2022, 1 kilogram lëndë eksplozive, 6 kilogramë lëndë narkotike cannabis sativa dhe sasi municioni luftarak, të cilat u gjetën dhe u sekuestruan nga Policia, ditën e operacionit”, thuhet në njoftimin e policisë.
Lini një Përgjigje