FLASH
Shkruar nga Pamfleti
Policia ka arrestuar 30-vjeçarin Fatbardh Ismaili i kërkuar për vrasje të mbetur në tentativë ndaj ish deputetit të PS, Armando Prenga.
Në maj të 2023, 30-vjeçari qëlloi me armë zjarri drejt Armando Prengës, ish-deputeti socialist, incident ky i ndodhur gjatë numërimit të votave në maj të vitit të kaluar.
"Në zbatim të planit të masave të hartuar në kuadër të operacionit mbarëkombëtar “Sundimi i ligjit” për kapjen e personave në kërkim, nga shërbimet e Komisariatit të Policisë Kurbin në bashkëpunim edhe me Forcat Kombëtare të Sigurisë (FKS) bazuar në informacionet e siguruara nga inteligjenca policore mbi vendndodhjen në fshatin Gurëz, njësia administrative Fushe Kuqe, Kurbin, të një personi në kërkim, është organizuar puna operacionale ku si rezultat u kap dhe u ndalua shtetasi F. I. 30 vjeç, banues në Fushe Kuqe, Kurbin.
30-vjeçari ishte shpallur në kërkim kombëtar pasi Gjykata e Shkallës së Parë Lezhë me vendim penal datë 25.05.2023, ka caktuar ndaj tij masën e sigurisë “arrest me burg” për veprat penale “Vrasje me dashje’ mbetur në tentativë” dhe “Mbajtja pa leje dhe prodhimi i armëve, armëve shpërthyese e municioneve.”, njofton policia.
Si ndodhi atentati ndaj Armando Prengës?
Ish-deputeti socialist Armando Prenga më 17 Maj 2023 i ka shpëtuar një atentati me armë në aksin Laç-Patok. Ishte vetë Prenga që ka njoftuar policinë dhe ka bërë denoncimin se u qëllua tre herë me pistoletë teksa ecte me makinë nga një tjetër mjet në lëvizje.
Ngjarja dyshohet se e ka zanafillën një ditë më parë (16 Maj 2023) në një konflikt gjatë numërimit të votave në KZAZ 15 Kurbin aty ku u përplasën vëzhguesit mes të cilëve ishte dhe babai i autorit Islam Ismaili si vëzhgues i ‘Bashkë Fitojmë’, por me profesion avokat.
Sherri në KZAZ nisi për dy vota të kontestuara deri në përplasje fizike mes vëllait të Armando Prengës, Arben Prenga dhe Islam Ismailit duke u përfshirë edhe të tjerë përfaqësues të partive. Avokati Ismaili ka bërë kallëzim në polici se Prenga dhe komisioneret e PS e kanë goditur me grushte duke i ndarë policia e cila nuk ka shoqëruar asnjë nga personat e përfshirë në konflikt. Ngjarje e filmuar nga kamerat e KZAZ. Sipas dëshmisë së dhënë nga Islam Ismaili ai është kërcënuar teksa ishte duke pirë kafe që të mos merrej me fushatë se do të ketë pasoja.
Lini një Përgjigje