FLASH
Shkruar nga Pamfleti
Policia është në kërkim të autorit dhe po ashtu po kërkohet për gjetjen e kufomës.
Një ngjarje e rëndë ka ndodhur në Dhërmi, pasi një i ri dyshohet të jetë marrë peng dhe më pas është vrarë.
Lajmin e ka dhënë vetë policia rajonale. Sipas saj, më datë 06.06.2024, kanë marrë njoftim se në Dhërmi shtetasi Eraldo Nevruzi, 31 vjeç, banues në Tiranë, punonjës në recepsionin e një hoteli në Dhërmi, Himarë, kishte humbur kontaktet me pronarët e hotelit.
Me marrjen e njoftimit, Drejtoria Vendore e Policisë Vlorë dhe Komisariati i Policisë Himarë kanë ngritur një grup hetimor, në drejtimin e Prokurorisë së Juridiksionit të Përgjithshëm Vlorë.
Shërbimet e Policisë dhe grupi hetimor kanë shkuar në hotel dhe kanë kryer një sërë veprimesh hetimore. Nga veprimet hetimore dyshohet se shtetasi E. N. është qëlluar me armë zjarri, rreth orës 00:30, nga shtetasi Gerald Shehu, 43 vjeç, lindur në Tepelenë dhe banues në Angli.
Nga veprimet e tjera hetimore rezulton se pas ngjarjes shtetasi Gerald Shehu është larguar drejt Greqisë. Ndërkohë policia është në kërkim të autorit dhe po ashtu po kërkohet për gjetjen e kufomës. Autori pasi e ka vrarë të riun, e ka fshehur kufomën dhe është nisur drejt shtetit fqinj.
“Janë administruar në cilësinë e provës materiale, prova ligjore, si dhe janë shoqëruar deri në këto momente, për t’u pyetur në lidhje me këtë ngjarje, 29 shtetas. Nga tërësia e veprimeve të deritanishme dyshohet se kemi të bëjmë me një ngjarje të rëndë kriminale. Grupi hetimor, në drejtimin e Prokurorisë, vijon punën intensivisht për gjetjen e shtetasit E. N., si dhe për zbardhjen e rrethanave dhe dokumentimin e plotë ligjor të rastit. Në vijim, do të ketë njoftime të tjera për veprimet e kryera nga grupi hetimor”, thekson policia.
Lini një Përgjigje