FLASH
Shkruar nga Pamfleti
Ai falsifikoi vdekjen për të mbuluar një gjurmë të përgjakshme shkatërrimi, ndërsa përbindëshat e tij të pamëshirshëm bashkëpunonin me bandat shqiptare për të përmbytur Mbretërinë e Bashkuar me kokainë.
Por tani, mbreti i kartelit Wilmer “Pipo” Chavarria, i cili në mënyrë të habitshme iu nënshtrua 7 ndërhyrjeve kirurgjikale për ti shpëtuar gjurmimit të policive dhe agjencive ligjzbatuese, është larguar nga vendi i tij i fshehtë në Costa del Sol, duke shënuar fundin e një mbretërimi brutal të terrorit që dyshohet se është shkaku i mbi 400 vdekjeve.
Kapoja i kartelit të Ekuadorit, Los Lobos, u kap në Malaga, sipas Policisë Kombëtare të Spanjës, me zyrtarët që e cilësuan një "ditë historike" për vendin e Amerikës së Jugut, atje ku banda ka shkaktuar terror dhe gjakderdhje.
Si Ekuadori ashtu edhe SHBA-ja i kishin shpallur Los Lobos (Ujqërit), si një organizatë terroriste përgjegjëse për kontrabandën e drogës, minierat ilegale dhe qindra vrasje.
Kombi dikur ishte një fqinj relativisht paqësor i prodhuesve kryesorë të kokainës, Kolumbisë dhe Perusë, por vitet e fundit bandat ndërluftuese të drogës kanë shkaktuar një valë dhune të pashembullt, duke u frymëzuar nga kartelet meksikane me ekzekutime të tmerrshme që përfshijnë varjen e viktimave nga ura.
Banda Los Lobos vlerësohet të ketë 8,000 anëtarë dhe është një nga bandat kriminale më të fuqishme të Ekuadorit. Besohet se ata kanë lidhje të ngushta me fraksionet shqiptare që transportojnë kokainë në Mbretërinë e Bashkuar.
Rita Floyd, profesoreshë e Sigurisë Ndërkombëtare dhe Etikës në Universitetin e Birminghamit, thotë se ka disa faktorë që e kanë bërë Ekuadorin një vend ideal për shumimin e bandave globale të drogës, jo më pak rënia e grupit gueril kolumbian FARC, i cili kontrollonte tregtinë rajonale të trafikimit të drogës.
“Arsyet për rritjen e krimit të organizuar janë komplekse, por thelbësore për këtë zhvillim kanë qenë negociatat e paqes të Kolumbisë fqinje me grupin rebel FARC”, shpjegon ajo.
Në vijim ajo shprehet se grupet disidente u zhvendosën në Ekuador, ky vend doli të ishte ideal për tregtinë globale të drogës.
“Vendi ka rrugë të mira dhe shumë porte. Ka një ekonomi dollari dhe gjithashtu një prani të mirë në tregtinë globale të transportit detar. Eksporton banane, përmes arkave të të cilave transportohet kokaina kudo.
Rastësisht, bandat e drogës janë gjithashtu globale. Kriminelët e Evropës Lindore veprojnë në Ekuador. Pra, në fakt shteti po rrëmbehet nga krimi i organizuar ndërkombëtar", shprehet ajo.
Në tetor të vitit të kaluar, gangsteri skocez Jamie “Iceman” Stevenson u dënua me 20 vjet burg për pjesëmarrjen e tij në një komplot për të kontrabanduar kokainë me vlerë 100 milionë paund nga Ekuadori në Mbretërinë e Bashkuar në kuti me banane.
Larg nga të qenit paqësor, mbërritja e bandave do të thotë që Ekuadori është tani një nga vendet më të rrezikshme në botë, me një shkallë vrasjesh prej 50 për 100,000 banorë.
Ndërkohë, shqiptarët, të cilët dominojnë shitjen e kokainës në Britani, negociojnë drejtpërdrejt me bandat e Amerikës së Jugut për të siguruar dërgesa të mëdha droge.
Ekuadori është bërë një prodhues gjithnjë e më tërheqës sepse furnizimi i tij atje anashkalon portet kolumbiane, të cilat kanë qenë nën një shqyrtim të shtuar.
Të paktën 70 përqind e kokainës në botë tani rrjedh nëpër portet ekuadoriane.
Ndërkohë, Britania është tregu më i madh për kokainën në Evropë dhe ka shkallën e dytë më të lartë të përdorimit të kokainës në botë. Kjo e bën Mbretërinë e Bashkuar "vendin e zgjedhur" për grupet e krimit të organizuar, sipas zëvendësdrejtorit të NCA-së, Charles Yates.
Në vitin 2021, familja e sundimtarit të Los Lobos, Wilmer “Pipo” Chavarria, pretendoi se ai kishte vdekur nga një atak në zemër për shkak të Covid-it. Por një histori edhe më dramatike do të dilte në pah më vonë.
Në fakt, ai kishte marrë një identitet të ri dhe iku në Spanjë, duke vazhduar të drejtonte ndërmarrjet e tij kriminale, duke përfshirë minierat e paligjshme dhe duke porositur vrasje.
Duke shkruar në X këtë javë, presidenti ekuadoras Daniel Noboa tha se “disa e konsideruan të vdekur; ne e ndoqëm në ferrin e tij. Ky është ndryshimi kur ekziston vullneti për të luftuar për vendin tënd.”
"Ne kemi kapur objektivin me vlerën më të lartë. Sot mafia tërhiqet. Sot Ekuadori fiton", tha ai.
Ministri i Brendshëm John Reimberg tha se Chavarria ishte përgjegjës për të paktën 400 vdekje dhe kishte menaxhuar operacione kriminale nga burgu midis viteve 2011 dhe 2019.
Që kur u betua në detyrë në vitin 2023, Presidenti Noboa ka ecur përpara me një goditje të ashpër ushtarake kundër bandave kriminale të vendit. /Përshtatur nga The Sun/
Lini një Përgjigje