FLASH
Shkruar nga Pamfleti
Lufta në Lindjen e Mesme godet blerjet online, porositë nga Temu, Shein dhe Amazon do kushtojnë më shumë dhe mund të vonohen deri në 45 ditë...
Konflikti ushtarak në Lindjen e Mesme ka nisur të prekë drejtpërdrejt tregtinë globale dhe blerjet online. Kompanitë e transportit dhe gjigantët e e-commerce paralajmërojnë se porositë nga Temu, Shein dhe Amazon mund të vonohen dhe të kushtojnë më shumë për konsumatorët.
Tensionet ushtarake në rajon kanë çuar në mbylljen e Ngushticës së Hormuzit, një nga rrugët detare më të rëndësishme në botë për transportin e naftës dhe mallrave. Analistët e logjistikës raportojnë se bllokimi i kësaj rruge ka detyruar kompanitë e transportit të ndryshojnë itineraret e anijeve dhe të rrisin tarifat.
Kompani të mëdha të transportit detar kanë njoftuar klientët për tarifa shtesë për shkak të rrezikut të luftës. Kompania franceze CMA CGM ka vendosur një tarifë të re që e quan “emergency conflict surcharge”. Kompania gjermane Hapag-Lloyd ka shtuar tarifën “War Risk Surcharge”. Këto kosto shtesë kalojnë tek shitësit dhe më pas tek konsumatorët.
Disa kompani kanë nisur të devijojnë anijet përmes Kepit të Shpresës së Mirë në Afrikë për të shmangur zonat e rrezikut në Gjirin Persik. Ky itinerar është shumë më i gjatë dhe zgjat transportin me javë.
Agjencia AFP raportoi se Amazon ka zgjatur periudhën e dorëzimit të disa produkteve me të paktën 10 ditë. Në disa raste, platforma shfaq kohë dorëzimi nga 35 deri në 45 ditë për produkte që zakonisht mbërrinin në më pak se 35 ditë.
Një zëdhënës i Amazon deklaroi për median se kompania po ndryshon operacionet për shkak të situatës së sigurisë në rajon dhe po bashkëpunon me autoritetet lokale për të mbrojtur punonjësit dhe partnerët.
Situata u përkeqësua pasi dy qendra të dhënash të Amazon në Emiratet e Bashkuara Arabe dhe një objekt në Bahrein pësuan dëme nga sulme me dronë. CNBC raportoi se objektet dolën jashtë funksionit përkohësisht pasi dronët goditën instalimet dhe shkaktuan zjarr.
Temu dhe Shein nuk kanë dhënë përgjigje zyrtare për vonesat e mundshme. AFP raportoi se të dyja platformat kanë paralajmëruar për vonesa disa ditore në dorëzime për shkak të situatës në transportin ndërkombëtar.
Ngushtica e Hormuzit mbetet një nyje kritike për tregtinë rajonale. Ajo lidh portin e Dubait, Jebel Ali, një nga portet më të mëdha të kontejnerëve në botë dhe një qendër shpërndarjeje për më shumë se dhjetë vende në rajon.
Përmes kësaj rruge transportohen jo vetëm nafta, por edhe automjete nga Gjermania, makineri industriale, produkte bujqësore nga Franca, kozmetikë dhe farmaceutikë. Çdo ndërprerje në këtë korridor detar krijon zinxhir reagimesh në ekonominë globale.
Ekspertët paralajmërojnë se nëse konflikti vazhdon, vonesat dhe rritja e çmimeve në tregtinë online mund të zgjasin për muaj. Për konsumatorët kjo do të thotë një realitet i ri, porosi më të shtrenjta dhe pritje më të gjata për paketat që vijnë nga jashtë.
Eshte edhe rruga ajrore pervec rruges fetare,dha nga sa Kam pare nga porosite qe bej ne temu,I dergojne me rruge ajrore,te pakten ate shkruan Kur une gjurmoj porosine!
Çna duhet deti? Mua Temua mi dërgon me avion.