FLASH
Shkruar nga Pamfleti
Sot, ustallarët nga Anadolli, do tu shpjegojnë deputetëve si të flasin në publik, duke recituar me pak fjalë atë që kërkojnë grupet ku PS synon votat...
Nuk është fare rastësi përzgjedhja e Elbasanit, qytetit që e krijoi një sulltan i rëndësishëm i Perandorisë osmane.
Nuk ishte dosido pasi bëhet fjalë për Mehmetin e Dytë, atë që turqit e thërrasin me emrin Fatih- pushtuesi, ngaqë arriti të marrë Konstandinopojën. E një nga njerëzit që u shquan në sulmin ndaj kryeqytetit të Bizantit ishte shqiptari Ballaban Pasha, një nga gjeneralët më të rëndësishëm të Mehmetit.
Ish- jeniçer nga Mati, i afërt me Skënderbeun, u kthye në armikun më të madh dhe në mallkimin e tij.
Ishte Ballaban Basha që ngriti dhe pagëzoi Elbasan qytetin që lidhte rrugën me Stambollin, për të siguruar prapavijat që i sulmonte me egërsi Skënderbeu.
Sot pas afro 6 shekujsh, një dost i sulltanit të ri të Turqisë, Erdoganit, do të trajnojë deputetët prej ustallarëve të komunikimit nga një fondacion i AK, Parti e Erdoganit.
E gjithë meseleja konsiston se si të mësohen deputetët e Partisë Socialiste, që të mos kenë siklet për të shpjeguar në publik pushtetin shumë të gjatë të tyre dhe oreksin që nuk i mpaket dostit të Erdoganit.
Tashmë PS-ja duket se nuk ja merr më shërbimet Tony Blairit dhe ish-zëdhënësit të tij legjendar Alaistar Kambellit.
Për çdo perëndimor, mandati i tretë konsiderohet pak si tepër, e vetë Tony Blair, mandatin e tretë e ndau në dysh me kolegun e tij dhe rivalin në parti, Gordon Brown.
Ndërsa për anadollakët e AKP, jo vetëm që mungon sikleti për qeverisjen e gjatë që në vitin 1999, por këtë sëmundje do ja mësojnë edhe kardeshlerëve arnautë të mikut të sulltanit.
Në të vëtetë nuk është hera e parë që PS-ja merr leksione nga spin doktorat nga Anadolli. Shpesh herë punonjës dhe deputetë të PS-së, kanë frekuentuar Akademinë e AK në Bursa dhe Ankara.
Ka të paktën që në zgjedhjet e vitit 2021 që PS trajtohet nga ustallarët e partisë së Erdoganit, i cili akademinë e përgatitjes politike e ka gjë serioze. AK ka arritur që të mbajë prej vitesh një grupim zgjedhësish besnikë, që e kanë kthyer partinë në një pushtet të palëvizshëm.
Praktikisht elektorati i Erdoganit është më shumë një “xhemat” besimtarësh, që mban lidhje gati religjoze me sulltanin dhe partinë e tij. Të gjithë të tjerët konsiderohen si “qafira” që punojnë kundër.
Njësoj siç ndodh edhe këtu tek ne, ku PS kërkon të mbajë 700 deri 800 mijë votues pa lëvizur, e kështu është e sigurtë që nuk lëviz nga pushteti.
Vetë Edi Rama e ka deklaruar disa herë se ka marrëdhënie të ngushtë me AKP. Madje në zgjedhjet presidenciale turke, Rama postoi në rrjetet sociale se ekipi i sondazheve të PS-së gjeti rezultatin më të saktë të votimeve atje, përpara ekpit të sulltanit.
Që do të thotë se marrëdhënia mes PS-së dhe AKP është më shumë se e ngushtë; është organike.
Sot, ustallarët nga Anadolli, do tu shpjegojnë deputetëve si të flasin në publik, duke recituar me pak fjalë atë që kërkojnë grupet ku PS synon votat.
Filozofia e tyre është e thjeshtë; mos u merrni me ekzigjencat apo kërkesat e atyre që votojnë kundër, por tu drejtohen vetëm grupeve të interesit që votojnë PS-në./Pamfleti
Lini një Përgjigje