FLASH
Shkruar nga Pamfleti
Qeveria hungareze ka nisur një hetim mbi marrëdhëniet e ish-ministrit të Jashtëm, Peter Szijjarto, me Rusinë, konfirmoi kryeministri Peter Magyar, pa dhënë detaje të mëtejshme për çështjen, raportoi gazeta Hungarian Conservative.
Në një konferencë për shtyp të mbajtur të enjten, Magyar tha se hetimi përfshin dokumente të klasifikuara të Ministrisë së Jashtme, si dhe dokumente të tjera zyrtare.
"Ka dokumente të klasifikuara, ka dokumente të Ministrisë së Jashtme dhe lloje të tjera dokumentesh. Kur të kemi diçka për t'i bërë publike, do ta bëjmë", deklaroi ai.
Kryeministri shtoi se nuk dëshiron të "paragjykojë çështjen" dhe nuk dha informacione të tjera mbi ecurinë e hetimit.
Sipas Hungarian Conservative, njoftimi vjen pas raportimeve mediatike të publikuara në fillim të këtij viti, të cilat pretendonin se Szijjarto kishte ndarë informacione me zyrtarë rusë gjatë kohës që drejtonte diplomacinë hungareze.
Nga ana e tij, Szijjarto i ka mohuar më herët këto akuza, duke i cilësuar pjesërisht si "lajme të rreme". Ai ka argumentuar se mbajtja e kontakteve me homologët rusë, amerikanë, turq dhe izraelitë ishte pjesë e praktikës normale diplomatike.
Njoftimi për hetimin erdhi vetëm dy ditë pasi Szijjarto bëri të ditur se po largohej nga parlamenti për t'iu bashkuar prodhuesit kinez të automjeteve elektrike BYD, ku do të mbajë një pozicion ekzekutiv ndërkombëtar
Lini një Përgjigje