FLASH
Shkruar nga Pamfleti
Janë publikuar pamjet nga momentet e panikut të shkaktuara nga tërmeti i fuqishëm me magnitudë 7.4 ballë që goditi brigjet perëndimore të Meksikës. Videot e shpërndara nga mediat lokale dhe në rrjetet sociale tregojnë banorë që dalin me nxitim nga ndërtesat, ndërsa në Guatemalë u evakuua edhe një godinë qeveritare për shkak të lëkundjeve të forta.
Tërmeti u regjistrua në brigjet e shtetit meksikan të Chiapas, me epiqendër në det, rreth 71 kilometra në jugperëndim të Puerto Madero, në një thellësi prej rreth 10 kilometrash, sipas Institutit Gjeologjik të SHBA-së (USGS).
Lëkundjet u ndjenë fuqishëm jo vetëm në Meksikë, por edhe në Guatemalë dhe El Salvador, ku banorët raportuan momente paniku. Dëshmitarët thanë për agjencinë Reuters se ndërtesat u lëkundën fort, duke detyruar shumë persona të dilnin në rrugë për arsye sigurie.
Ndërkohë, Qendra Amerikane e Paralajmërimit për Cunami në Paqësor (PTWC) bëri të ditur se ekziston rreziku i krijimit të valëve të cunamit në zonat bregdetare deri në 300 kilometra nga epiqendra e tërmetit, ndërsa autoritetet vijojnë monitorimin e situatës.
Deri në këto momente nuk ka raportime zyrtare për viktima apo dëme të mëdha materiale, ndërsa ekipet e emergjencës po kryejnë verifikime në zonat e prekura. Pamjet e publikuara tregojnë qartë forcën e lëkundjeve dhe reagimin e menjëhershëm të qytetarëve, të cilët braktisën ndërtesat sapo u ndje tërmeti.
???? 7.4 EARTHQUAKE STRIKES MEXICO
— Rosa News Official (@Mirha1206) July 17, 2026
A powerful 7.4-magnitude earthquake has struck off the Pacific coast of Mexico, sending strong tremors across parts of the country.#BreakingNews #Earthquake #Mexico #Tsunami #TsunamiWarning #Seismic #NaturalDisaster #PacificOcean pic.twitter.com/Z2pSoJzSoS
Lini një Përgjigje