FLASH
Shkruar nga Pamfleti
Presidenti ukrainas Volodymyr Zelensky u ka bërë sërish thirrje Shteteve të Bashkuara dhe aleatëve të tjerë të shpejtojnë hapat për marrëveshjet për armët dhe furnizimet e tjera për të ndihmuar Ukrainën në luftën kundër pushtimit të nisur nga Rusia.
Në një video-mesazh të publikuar mbrëmjen e djeshme, Zelensky tha se “situata është kritike dhe të gjitha shtetet, veçanërisht SHBA, të zbatojnë menjëherë marrëveshjet e arritura me Ukrainën”.
“Ndikimi duhet të ndihet në front. Çdo vonesë e ndihmave ushtarake ka pasoja negative në front”, tha Zelensky.
Përpjekjet e mëdha për të ndihmuar ushtarakisht Ukrainën po vazhdojnë, teksa NATO-ja po përballet me thirrje nga disa shtete anëtare që të furnizojë Kievin me armë më të avancuara.
Kievi po ashtu vazhdimisht thotë se ka nevojë që të kryejë sulme brenda territorit rus me armë me rreze të gjatë veprimi, në mënyrë që të mbrojë veten nga forcat pushtuese ruse. Ky argument ukrainas është mbështetur nga disa zyrtarë të NATO-s.
Kryeministri britanik, Keir Starmer, u takua në Shtëpinë e Bardhë më 13 shtator me presidentin amerikan, Joe Biden, për të diskutuar nëse duhet miratuar kërkesa e Ukrainës për të përdorur armë me rreze të gjatë veprimi kundër caqeve në Rusi.
Këshilltari për siguri kombëtare i SHBA-së, Jake Sullivan, tha se Biden “është i vendosur që t’i përdorë katër muajt që i kanë mbetur të mandatit dhe ta vendosë Ukrainën në pozitën më të mirë të mundshme në mënyrë që të triumfojë”.
Presidenti rus, Vladimir Putin, tha më herët se Perëndimi do të ishte “në luftë” me Rusinë nëse i lejon Ukrainës të sulmojë me raketa me rreze të gjatë, të prodhuara në Perëndim, ndërkaq Medvedev u shpreh se Rusia mund ta shkatërrojë kryeqytetin ukrainas, Kiev, me armë jobërthamore nëse Perëndimi heq kufizimet e tij.
Lini një Përgjigje