FLASH
Shkruar nga Pamfleti
Presidenti i Shteteve të Bashkuara, Donald Trump, ka shprehur në biseda private interes serioz për mundësinë e dërgimit të trupave amerikane në territorin e Iranit, sipas dy zyrtarëve amerikanë, një ish-zyrtari të SHBA-së dhe një personi tjetër me njohuri për diskutimet, të cituar nga NBC News.
Sipas raportimit, Trump e ka diskutuar idenë e vendosjes së forcave tokësore me këshilltarë dhe zyrtarë republikanë jashtë Shtëpisë së Bardhë. Në këto biseda ai ka paraqitur edhe vizionin e tij për një Iran pas konfliktit, ku programi i uraniumit të vendit do të ishte nën kontroll dhe ku Shtetet e Bashkuara do të bashkëpunonin me një qeveri të re iraniane në prodhimin e naftës.
Burimet theksojnë se diskutimet nuk lidhen me një pushtim të gjerë tokësor të Iranit. Sipas NBC, presidenti amerikan ka shqyrtuar kryesisht skenarin e vendosjes së një numri të kufizuar trupash, të cilat do të përdoren për objektiva specifike strategjike.
Megjithatë, sipas të njëjtave burime, nuk është marrë asnjë vendim dhe Trump nuk ka dhënë asnjë urdhër zyrtar për dislokimin e forcave tokësore.
Publikisht, presidenti amerikan nuk e ka përjashtuar mundësinë e dërgimit të trupave në Iran, por deri tani operacionet ushtarake janë kufizuar kryesisht në sulme ajrore.
Diskutimet private, sipas NBC, sugjerojnë se Trump mund të jetë më i gatshëm të shqyrtojë këtë opsion sesa lë të kuptohet nga deklaratat e tij publike.
Në bisedat me bashkëpunëtorët, ai ka përmendur si model një skenar të ngjashëm me marrëdhënien që është krijuar midis SHBA-së dhe Venezuelës, pasi forcat speciale amerikane arrestuan presidentin venezuelian Nicolás Maduro në janar të këtij viti. Sipas këtij vizioni, një qeveri e re në Iran do të mund të bashkëpunonte me SHBA-në në sektorin energjetik.
Lini një Përgjigje