FLASH
Shkruar nga Pamfleti
Temperaturat e larta kanë shkaktuar zjarret e para të mëdha në Greqi. Dy vatra zjarri shpërthyen pranë Athinës duke detyruar banorët të largohen nga shtëpitë e tyre dhe duke nxitur evakuimin e qindra fëmijëve nga një kamp veror. Më shumë se 200 zjarrfikës të ndihmuar nga 20 ushtarë, 10 avionë dhe 6 helikopterë janë ende duke luftuar me flakët.
Disa prej banorëve të prekur nga zjarret thonë se autoritetet greke nuk po veprojnë në kohë.
“Nuk ka zjarrfikës, nuk ka helikopterë, nuk ka aeroplanë, disa djem u përpoqën të shpëtonin një shtëpi, por është e pamundur, zjarri është shumë i madh, era është shumë e fortë, kështu që nuk mund të bëjnë asgjë.”
Vatrat e zjarrit që fillimisht u shfaqën në fshatin Kouvaras, 30 kilometra larg Athinës, u përhapën me shpejtësi në jug drejt vendpushimeve bregdetare si Lagonisi, Anavyssos dhe Saronida. Edhe në Zvicër autoritetet kanë urdhëruar evakuimin e disa fshatrave në rajonin e Valais. Rreth 200 zjarrfikës po punojnë për shuarjen e zjarreve.
Ndërsa në rajonin Hatay në Turqi që u godit më shumë nga tërmeti i Shkurtit, vazhdojnë përpjekjet e tyre për të shuar zjarret e furishme që filluan të kërcënojnë zonat e banuara. Sipas njoftimeve zyrtare, nga zjarri janë evakuuar 3 fshatra, janë djegur 7 shtëpi dhe janë dëmtuar 4 automjete.
Zjarret po shpërthejnë në disa pjesë të Evropës, duke përfshirë ishullin spanjoll La Palma dhe gjatë natës në alpet zvicerane.
Ndërkohë, Agjencia Botërore Meteorologjike ka verifikuar zyrtarisht një temperaturë të re rekord në Evropë prej 48.8 C (119.8 F) të vendosur në Siçili gjatë një vale të nxehtë në gusht 2021.
Lini një Përgjigje