FLASH
Shkruar nga Pamfleti
Prokurori i Përgjithshëm, Merrick Garland, ka njoftuar se do të emërojë një prokuror të posaçëm në rastin kundër zotit Hunter Biden, duke thelluar hetimet ndaj djalit të Presidentit Biden në prag të zgjedhjeve presidenciale të vitit 2024.
Garland tha të premten se do të emërojë prokurorin David Weiss, nga shteti Dellauer, që po heton aktualisht aktivitetet financiare dhe tregtare të djalit të presidentit, si prokuror të posaçëm për këtë rast.
Garland deklaroi të martën se zoti Weiss i kishte thënë se “sipas gjykimit të tij, hetime kishin arritur në një fazë, ku funksionet e tij të mëtejshme mund të vazhdojnë vetëm me statusin e Prokurorit të Posaçëm dhe ka kërkuar nga unë, që ta emëroj atë në një pozitë të tillë.”
“Pas shqyrtimit të kërkesës së tij, si dhe rrethanave të jashtëzakonshme që lidhen me këtë rast, kam ardhur në përfundimin, që është në interes të publikut, ta emëroj atë prokuror të posaçëm”, tha Garland.
Ky veprim është një hap i rëndësishëm nga Garland, që njihet si i kujdesshëm dhe vjen në një kohë kur Departamenti i Drejtësisë po ndërmerr një sërë hetimesh ndaj ish Presidenti, Donald Trump, rivali kryesor i Presidentit Biden në zgjedhjet e vitit të ardhshëm.
Emërimi i prokurorit të posaçëm po ashtu u bë krahas hetimit që ligjvënësit republikanë po përgatisin për bizneset e Hunter Biden-it./VOA
Lini një Përgjigje