FLASH
Shkruar nga Pamfleti
Ishulli i Rodosit në Greqi vijon të jetë nën terrorin e flakëve.
Pesë helikopterë dhe 173 zjarrfikës po operojnë në zonë, ndërsa tre hotele në zonën e Kiotarit raportohet se janë dëmtuar nga zjarri. Zonat e Laermës, Lardos dhe Asklipio u prekën gjithashtu. Deri më tani janë zhvendosur 100 mijë persona, ndërsa deri nesër ky numër pritet të shkojë në 30 mijë.
Varkat private iu bashkuan rojes bregdetare greke për të ndihmuar në marrjen e njerëzve nga plazhet në lindje të ishullit. Anijet e marinës greke u raportuan gjithashtu se po shkonin drejt zonës, e cila është e njohur për turistët.
Zëvendës shefi i zjarrfikësve Ioannis Artophios tha se një traget është në dispozicion për të akomoduar njerëzit. Të tjerët janë vendosur në stadiumin e brendshëm në ishull, sipas nënkryetarit të bashkisë së ishullit.
Televizioni grek shfaqi radhë të gjata turistësh me valixhet që dërgoheshin në vend të sigurt, me tym në sfond.
Një grua britanike tha se ishte evakuuar nga hoteli ku po qëndronte me motrën dhe vajzën e saj, por tani ishte ngecur në një plazh me qindra të tjerë në vapën e madhe.
"Këtu ka vetëm një kasolle të vogël dhe ka shumë prej nesh," tha Becky Mulligan për BBC. "Ka fëmijë, është mesi i ditës, ne kemi ngecur këtu pa asnjë ndihmë, është e neveritshme."
Katie Piercefield-Holmes, e cila mbërriti në ishull të enjten, e përshkroi situatën si "kaotike".
"Sot ishte normale deri në kohën e drekës kur qielli u bë portokalli. Ishte si një muzg në mes të ditës," tha ajo për BBC.
Lini një Përgjigje