FLASH
Shkruar nga Pamfleti
Një zyrtar i lartë iranian ka konfirmuar se Teherani ka paraqitur një propozim të ri për Shtetet e Bashkuara, i cili parashikon hapjen e lundrimit në Ngushticën e Hormuzit dhe heqjen e bllokadës amerikane ndaj Iranit, ndërsa çështja e programit bërthamor do të shtyhej për një fazë të mëvonshme.
Sipas raportimit të Reuters, zyrtari që foli në kushte anonimiteti për shkak të ndjeshmërisë së negociatave, deklaroi se ky ndryshim synon të krijojë kushte më të favorshme për arritjen e një marrëveshjeje.
Ai theksoi se, në kuadër të këtij propozimi, negociatat për çështjen bërthamore, e konsideruar si më e ndërlikuara, do të zhvillohen në fazën përfundimtare të procesit diplomatik.
Propozimi i është përcjellë palës amerikane përmes ndërmjetësve dhe, sipas të njëjtit burim, përfshin edhe elementë sigurie rajonale. Konkretisht, ai parashikon përfundimin e konfliktit aktual me garanci që Shtetet e Bashkuara dhe Izraeli nuk do të ndërmarrin sulme ndaj Iranit.
Në këmbim, Irani do të lejonte qarkullimin e lirë në Ngushticën e Hormuzit, një rrugë strategjike për tregtinë globale të energjisë, ndërsa SHBA-të do të hiqnin masat bllokuese ekonomike.
Megjithatë, sipas të njëjtave burime, propozimi është refuzuar deri tani nga presidenti amerikan Donald Trump.
Lini një Përgjigje