FLASH

TAGS-AT E JAVËS

Rajoni dhe Bota 6 Mars 2026, 16:14

“Plas” mes Zelenskyt dhe Orbanit/ Hungaria i sekuestron 75 mln euro cash dhe 9 kg ar Ukrainës, Kievi: Akt terrorist!

Shkruar nga Pamfleti

“Plas” mes Zelenskyt dhe Orbanit/ Hungaria i sekuestron 75 mln euro

Pas kërcënimeve të ndërsjellta mes Kryeministrit hungarez, Viktor Orban dhe Presidentit ukrainas Volodymyr Zelensky, situata ka përfunduar në arrestime...

Përplasja mes Hungarisë dhe Ukrainës ka arritur në një tjetër nivel. Pas kërcënimeve të ndërsjellta mes Kryeministrit hungarez, Viktor Orban dhe Presidentit ukrainas Volodymyr Zelensky, situata ka përfunduar në arrestime.

Administrata Kombëtare e Taksave dhe Doganave të Hungarisë (NAV), kanë njoftuar sot, se ditën e djeshme kanë arrestuar 7 shtetas ukrainas përfshirë një ish-gjeneral të inteligjencës ukrainase si dhe kanë sekuestruar dy kamionë të blinduar me para Cash, një total prej 40 milionë dollarësh dhe 35 milionë eurosh si dhe 9 kilogramësh ari. Dy kamionët ishin nisur nga Austria, më pas do të kalonin tranzit në Hungari dhe do të përfundonin Ukrainë.  

“Plas” mes Zelenskyt dhe Orbanit/ Hungaria i sekuestron 75 mln euro
Paratë dhe ari i sekuestruar

Autoritetet hungareze kanë deklaruar se kjo masë është marrë si shkak i dyshimeve se kjo është një skemë pastrimi parash.

“Administrata Kombëtare e Taksave dhe Doganave (NAV) po kryen procedura penale nën dyshimin për pastrim parash. Më 5 mars 2026, ajo arrestoi shtatë shtetas ukrainas, përfshirë një ish-gjeneral të inteligjencës ukrainase, dhe dy kamionë të blinduar me para që dyshohet se po transportonin një total prej 40 milionë dollarësh, 35 milionë eurosh dhe 9 kilogramë ari nga Austria në Ukrainë. Vetëm këtë vit, më shumë se 900 milionë dollarë amerikanë, 420 milionë euro dhe 146 kilogramë lingota ari u transportuan përmes territorit hungarez në Ukrainë. NAV po kryen hetimin në përputhje me Aktin e Procedurës Penale, me ndihmën e Qendrës Kundër Terrorizmit.  Administrata Kombëtare e Taksave dhe Doganave njoftoi menjëherë shërbimin konsullor ukrainas kur filloi procedura, por deri më sot nuk është marrë asnjë reagim nga shërbimi konsullor”, thuhej në njoftimin e NAV.

“Plas” mes Zelenskyt dhe Orbanit/ Hungaria i sekuestron 75 mln euro
Paratë e sekuestruara

Qendra Kundër Terrorizmit bastisi dy furgonët me para në cash dhe me targa ukrainase në një pikë karburanti në autostradën M5 gjatë ditës së enjte. Njerëz të veshur me të zeza u nxorën nga makinat dhe u shtrinë përtokë. Kishte disa dëshmitarë okularë për bastisjen. Pas operacionit, konvoji i TEK u nis drejt Budapestit.

Dyshimet për paratë?

Gazetari austriak, Richard Schmitt shkroi në faqen e tij në rrjetet sociale se 75 milionë euro dhe dollarë amerikanë, si dhe 9 kilogramë ar, do të transportoheshin me automjete nga Banka Raiffeisen në Vjenë për në Ukrainë dhe se gjithçka ishte e rregullt. Sipas tij, Viktor Orban e ndaloi dërgesën e arit për në Ukrainë pasi mori kërcënime me vdekje nga ana e Zelenskyt një ditë më parë.

Por një YouTuber, ukrainas Anatoliy Shariy, ka hedhur dyshime mbi sasinë e sekuestruar të parave. Ai thekson se sasia e kapur nuk ishte "tamam e zakonshme" dhe Viktor Orbán e dinte për këtë. Sipas ukrainasit, ato para u dyshua se ishin të Zelenskyt, por pas disa hulumtimeve rezulton se ato u përkasin kolegëve të tij europianë. Ai theksoi se Orbani ka nervozuar shumë njerëz në BE me këtë goditje dhe shtoi se jami fare pranë shpërthimit të një skandali të madh.

“Jam i bindur se paratë ishin të Zelensky-t. Një lloj abuzimi. Megjithatë, sot mora informacion se paratë nuk i përkisnin Zelensky-t, por kolegëve të tij evropianë. Historia është plotësisht fantastike, dhe dje më dukej jorealiste. Por sot, shumë burime raportojnë se Orbán nuk goditi në Kiev, por në Bruksel. Bëhet fjalë për 80 milionë euro dhe rreth 10 kilogramë ar. Në Bruksel, ata e dinë se kujt i përkasin paratë. Dhe për këtë arsye, tani, më duket mua, po bëjnë gjithçka për të parandaluar shpërthimin e skandalit. Orbán veproi shumë saktë dhe goditi aty ku dhemb”, shtoi ai.

-Reagimi i Ukrainës

Ukraina e ka quajtur arrestimin e 7 qytetarëve të saj si “pengmarrje”. Ministri i jashtëm ukrainas, Andriy Szibiha deklaroi se autoritetet hungareze kanë “marrë peng praktikisht” shtatë qytetarë ukrainas në Budapest.

Ukraina pretendon se ata ishin punonjës të bankës shtetërore Oschadbank, dhe se po transportonin para të gatshme midis Austrisë dhe Ukrainës kur u arrestuan. Ata shtuan se vendndodhja e tyre mbetet e panjohur.

Qëndrimi i Ministrit të Jashtëm ukrainas Andriy Sibiha lidhur me rastin, u nda nga Ambasada e Ukrainës në Hungari, ku thuhej se ky ishte terrorizëm dhe shantazh shtetëror.

“Sot në Budapest, autoritetet hungareze morën peng shtatë qytetarë ukrainas. Arsyet për këtë janë aktualisht të panjohura, si dhe gjendja e tyre shëndetësore apo nëse është e mundur të kontaktohen. – thuhet në postim. Ata shtuan se shtatë shtetasit ukrainas ishin punonjës të Oschadbank (Bankës së Kursimeve) në pronësi të shtetit. Ata po drejtonin dy automjete bankare që po kalonin tranzit midis Austrisë dhe Ukrainës, duke transportuar para të gatshme si pjesë e një shërbimi të rregullt midis bankave shtetërore. Praktikisht, bëhet fjalë për një rast të Hungarisë që merr pengje dhe vjedh para. Nëse kjo është "forca" për të cilën foli Viktor Orbán sot, atëherë është forca e një organizate kriminale. Ky është terrorizëm dhe shantazh shtetëror”, thuhej në reagim.

Një deklaratë u botua gjithashtu në faqen e internetit të Oschadbank , duke pretenduar se shtatë punonjës të institucionit financiar u "ndaluan në mënyrë të paligjshme në Hungari". Sipas deklaratës, vendndodhja e personave është e panjohur, por automjetet e bankës, sipas të dhënave të GPS-it, mund të gjenden në qendër të Budapestit, "pranë njërës prej agjencive hungareze të sigurisë".

“Transporti i fondeve dhe sendeve me vlerë u krye nga Oschadbank brenda kuadrit dhe për qëllimin e zbatimit të një marrëveshjeje ndërkombëtare të lidhur me Bankën Austriake Raiffeisen. Ngarkesa u përgatit në përputhje me rregullat ndërkombëtare të transportit dhe procedurat aktuale doganore evropiane”, tha institucioni financiar ukrainas. “Oschadbank kërkon lirimin e menjëhershëm të punonjësve të saj dhe kthimin e pronës së saj, si dhe kthimin e saj në Ukrainë”, tha institucioni financiar në një deklaratë.

Situata për rastin në fjalë mbetet ende e paqartë, por zanafilla e gjithë kësaj është bllokimi i tubacionit të naftës ruse që kalon nga Ukraina në Hungari. Budapesti është përgjigjur më pas me bllokimin e fondit prej 90 mld eurosh që BE-ja synon t’i japë Ukrainës. Kjo përplasje ka nxitur më pas një reaksion zinxhir.

Ditën e djeshme ishte Zelensky ai që kërcënoi Orbánin hapur. Presidenti ukrainas tha se do t'ua jepte numrin e telefonit të presidentit hungarez Forcave të Armatosura të Ukrainës nëse ai nuk do të hiqte bllokimin e kredisë prej 90 miliardë eurosh të Bashkimit Evropian.

Lidhur me restaurimin e tubacionit të naftës, Zelensky tha se nuk do ta restauronte atë vetëm sepse Orbani nuk fiton dot zgjedhjet pa të.

"Unë nuk do ta restauroja atë, ky është qëndrimi im. U thashë gjithashtu udhëheqësve të Evropës se do të na vrasin, nuk do t'i japim naftë ruse Orbán-it, sepse ai, i varfëri, nuk mund t'i fitojë zgjedhjet pa të”, tha Zelensky.

Viktor Orbán nuk e la pa përgjigje teksa theksoi se kërcënimet nuk janë ndaj tij, por ndaj Hungarisë dhe se Zelensky do ta marrë atë që meriton.

“Kërcënimet e Zelensky-t nuk kanë të bëjnë me mua. Ai po kërcënon Hungarinë. Por ai nuk mund të më shpërqendrojë nga mbrojtja e familjeve hungareze”, u përgjigj kryeministri./Pamfleti

 

ukrainë hungari sherr

Lini një Përgjigje

Rajoni dhe Bota

Na ndiqni edhe në
KONTAKT TE DHENAT PERSONALE COOKIES