FLASH
Shkruar nga Pamfleti
Kryeministri i Hungarisë, Péter Magyar, ka propozuar uljen e moshës së votimit nga 18 në 16 vjeç, si pjesë e procesit të reformës kushtetuese që po ndërmerr qeveria e tij. Sipas tij, adoleshentët e sotëm janë mjaftueshëm të informuar për të marrë pjesë në vendimmarrjen që lidhet me të ardhmen e vendit.
"Besoj se shumica dërrmuese e të rinjve nën moshën 18 vjeç janë mjaftueshëm të përgatitur dhe të informuar për të pasur një zë në vendimet tona të përbashkëta. Sa më përket mua, gjatë hartimit të Kushtetutës së re do të mbështes uljen e moshës së votimit në 16 vjeç", shkroi Magyar.
Reforma kushtetuese
Magyar e lidhi këtë propozim me reformën e gjerë kushtetuese që qeveria e tij nisi pas zgjedhjeve të përgjithshme të muajit prill.
Ai tha se është i kënaqur që, sipas tij, demokracia parlamentare hungareze po rigjallërohet pas viteve gjatë të cilave Parlamenti ishte dobësuar qëllimisht nën drejtimin e ish-kryeministrit Viktor Orban.
Duke kujtuar fëmijërinë e tij, Magyar tregoi se në fillim të viteve 1990 ndiqte debatet parlamentare së bashku me gjyshen pas kthimit nga shkolla dhe aktivitetet sportive, përvojë që, sipas tij, ndikoi në vlerësimin që ka sot për institucionet demokratike.
Kritika ndaj qeverisjes së mëparshme
Kryeministri kritikoi edhe drejtuesit e mëparshëm të vendit, duke shprehur shpresën se në postet më të larta publike do të shërbejnë vetëm njerëz të përkushtuar ndaj interesit të Hungarisë.
Në një koment që u interpretua si kritikë ndaj ish-kryeministrit Viktor Orbán dhe presidentit aktual Tamás Sulyok, ai shkroi:
"Vetëm sepse një klloun hyn në një pallat, nuk bëhet mbret; por pallati mund të shndërrohet në cirk."
Në përgatitje reforma zgjedhore
Propozimi vjen në kohën kur qeveria po përgatit një reformë më të gjerë të sistemit zgjedhor.
Márton Melléthei-Barna, nënkryetar i grupit parlamentar të partisë në pushtet Tisza, deklaroi se një nga prioritetet e para pas miratimit të Kushtetutës së re e cila pritet t'i nënshtrohet referendumit – do të jetë hartimi i një ligji të ri zgjedhor.
Sipas tij, legjislacioni i ri mund të miratohet brenda 18 deri në 24 muajve.
"Të rinjtë janë më të angazhuar se kurrë"
Në postimin e tij, Magyar argumentoi se interesi i qytetarëve për politikën është rritur ndjeshëm pas ndryshimit të qeverisë.
"Jam krenar që kurrë më parë kaq shumë njerëz nuk kanë ndjekur seancat parlamentare dhe nuk janë interesuar për jetën publike", shkroi ai, duke shtuar se politika është bërë sërish "tërheqëse" dhe se të rinjtë ndiejnë gjithnjë e më shumë se kanë një rol në formësimin e së ardhmes së Hungarisë.
Ai theksoi gjithashtu se kufizimi i mandatit të deputetëve në 12 vjet, i parashikuar nga amendamenti i 17-të kushtetues, mund të ndihmojë në rritjen e standardeve të jetës publike dhe në rinovimin e klasës politike.
Çfarë do të ndryshonte?
Nëse propozimi miratohet, Hungaria do t'i bashkohet një grupi të vogël, por në rritje, vendesh që u japin të drejtën e votës 16- dhe 17-vjeçarëve në të paktën disa procese zgjedhore.
Megjithatë, propozimi është ende në fazë diskutimi dhe për të hyrë në fuqi duhet të përfshihet në Kushtetutën e re dhe në legjislacionin zgjedhor përkatës.
Lini një Përgjigje