FLASH
Shkruar nga Pamfleti
Nga pakënaqësia në popull te hetimet për korrupsion, çfarë do të bëhet me Netanyahu-n?
Të hënën në mëngjes, gjatë një fjalimi të drejtpërdrejtë në Knesset, presidenti amerikan Donald Trump u bëri thirrje deputetëve izraelitë që të ndalin procedurat për korrupsion kundër kryeministrit Benjamin Netanyahu. Kjo deklaratë u prit me duartrokitje të forta nga mazhoranca e djathtë dhe ekstremiste që dominojnë Parlamentin izraelit.
Por reagimi i publikut izraelit nuk është kaq i njëtrajtshëm. Vetëm një ditë më parë, i dërguari amerikan Steve Witkoff, gjatë një fjalimi në Tel Aviv, u përball me fishkëllima dhe refuzim të hapur nga turma sapo përmendi emrin e Netanyahu-t. Në të kundërt, emri i Trump u prit me brohorima dhe entuziazëm.
Ky kontrast shtron një pyetje themelore për të ardhmen e marrëveshjes së paqes për Gazën: A do ta kujtojnë izraelitët Netanyahu-n si njeriun që dobësoi Iranin dhe aleatët e tij, apo si arkitektin e dështimit më të rëndë të sigurisë më 7 tetor dhe njeriun që promovoi një axhendë anti-demokratike për vite me radhë?
Ky debat kishte ngecur përpara lirimit të pengjeve, por tani është rikthyer në qendër të diskutimit brenda shoqërisë izraelite.
Një episod domethënës ndodhi të hënën: Trump, në momentet e fundit, tentoi të ftonte Netanyahu-n në samitin për Gazën në Sharm el Sheikh, një event ku kryeministri izraelit nuk ishte ftuar. Por presidenti turk Recep Tayyip Erdogan kërcënoi se do të bojkotonte samitin nëse Netanyahu merrte pjesë. Netanyahu e refuzoi ftesën, duke përmendur një festë fetare.
Opinioni ndërkombëtar dhe barra mbi Netanyahu-n
Izraeli po përballet me një rritje të ndjeshme të armiqësisë ndërkombëtare për shkak të luftës së përgjakshme në Gaza, e cila ka shkaktuar mbi 60,000 të vdekur, përfshirë mijëra fëmijë. Në sytë e një pjese të madhe të opinionit publik botëror, është pikërisht Netanyahu ai që simbolizon këtë fushatë ushtarake të pamëshirshme.
Edhe brenda vendit, klima po ndryshon. Me rikthimin e pengjeve në shtëpi, shumë izraelitë i dhanë meritat Trump-it, jo kryeministrit të tyre, të njëjtit Netanyahu që e kundërshtoi për muaj të tërë përfundimin e luftës, dhe që më në fund u detyrua ta pranojë atë nën presionin e Uashingtonit.
Me ose pa të, Izraeli duhet të rindërtojë marrëdhëniet e tij ndërkombëtare, një detyrë që duket e pamundur për sa kohë Netanyahu është në pushtet. Ai përballet ende me një urdhër-arresti ndërkombëtar nga Gjykata Penale Ndërkombëtare.
Sa kohë ai dhe koalicioni i tij aktual të qëndrojnë në pushtet, nuk pritet asnjë proces real paqeje me palestinezët, asnjë perspektivë për një zgjidhje me dy shtete dhe asnjë ndalim i zgjerimit të vendbanimeve në territoret e pushtuara.
A është Netanyahu në rrezik politik?
Përgjigjja mbetet e paqartë. Popullariteti i Netanyahu-t ka lëkundur vazhdimisht gjatë dy viteve të fundit, duke ndjekur ritmin e krizave të njëpasnjëshme. Një sondazh i publikuar javën e kaluar e tregonte atë baras me opozitën në rast të mbajtjes së zgjedhjeve të reja – por ky sondazh është bërë përpara përfundimit të kësaj faze të luftës, dhe sidomos përpara lirimit të pengjeve.
Në fakt, Netanyahu mbetet një operator politik i fuqishëm – i zgjuar, taktik dhe gjithmonë i gatshëm të rizbulojë veten, si një feniks politik. Ai po mundohet të pozicionohet si fitues i kësaj faze të re, vetëm pak ditë pasi u detyrua, dhe madje u përul publikisht nga Trump, që i kërkoi falje Katarit për bombardimin e Dohas.
E vetmja gjë e qartë është se, për sa kohë Netanyahu dhe koalicioni i tij mbeten në pushtet, nuk do të ketë paqe reale në horizont. Por e ardhmja e tij është në dorën e izraelitëve. Në shumë mënyra, dita e hënë shënoi nisjen jozyrtare të fushatës së ardhshme elektorale, edhe pse data e zgjedhjeve mbetet e panjohur. /Përshtati “Pamfleti” nga “World Crunch”
Lini një Përgjigje