FLASH
Shkruar nga Pamfleti
Franca shmang krizën qeveritare?
Në orën 15:23, vetëm njëzet minuta pasi nisi fjalimin e tij të parë si kryeministër përpara deputetëve të Asamblesë Kombëtare, Sébastien Lecornu shpalli formulën që i ndryshoi fatin politik: “Do të propozoj pezullimin e reformës së pensioneve deri pas zgjedhjeve presidenciale të ardhshme”.
Ky ishte një nga tre kushtet kryesore që socialistët kishin vendosur për të mos rrëzuar qeverinë, dhe më i pasigurt nga të tre, pasi refuzimi për të përdorur nenin famëkeq 49.3 dhe pranimi i masave për drejtësi fiskale ishin thuajse të mirëkuptuara. Me këtë lëshim, Lecornu shmangu votën e mosbesimit dhe shpëtoi ekzekutivin.
Boris Vallaud, nga radhët e Partisë Socialiste, njoftoi zyrtarisht në sallën e Asamblesë Kombëtare se socialistët nuk do të votojnë rrëzimin e qeverisë, duke e quajtur pezullimin e reformës së pensioneve “një fitore për mijëra francezë”.
Të enjten do të hidhen në votim dy mocione mosbesimi, të paraqitura nga Rassemblement National i Marine Le Pen dhe France Insoumise e Jean-Luc Mélenchon, por pritet të mbledhin vetëm rreth 250 vota, shumë larg 289 votave të nevojshme për të rrëzuar qeverinë. Me 69 votat e socialistëve jashtë kësaj llogaritjeje, qeveria e Lecornu mbetet e qëndrueshme.
Kryeministri i ri ruajti balancën politike, duke u kujdesur që lëshimi ndaj socialistëve të mos e largojë të djathtën gauliste, e cila e mbështeste reformën. Lecornu theksoi se pezullimi “nuk mund të jetë thjesht për pezullim” dhe se do të ishte “i papërgjegjshëm” nëse nuk shoqërohet me ndryshime reale. Ai paralajmëroi se kostoja e reformës së pezulluar, 400 milionë euro në vitin 2026 dhe 1.2 miliardë në 2027, duhet të kompensohet përmes kursimeve, jo me rritje të deficitit.
Gjithashtu, ai pranoi edhe një tjetër kërkesë të socialistëve: vendosjen e një takse për super-miliarderët. Lecornu njoftoi krijimin e një “kontributi të jashtëzakonshëm për pasuritë e mëdha”, por pa përfshirë pasurinë profesionale, një dallim kyç nga ajo që kërkonte “taksimi Zucman” mbi 1,800 më të pasurit e Francës.
Së fundmi, ai u zotua se nuk do të përdorë nenin 49.3 të Kushtetutës, që lejon miratimin e ligjeve të buxhetit pa votë parlamentare, duke konsoliduar kthesën drejt një qeverisjeje më të hapur dhe parlamentare. Lecornu theksoi se Asambleja Kombëtare është “më përfaqësuese se kurrë më parë e popullit francez” dhe se nuk do të ketë as shpërndarje të Parlamentit, as zgjedhje të parakohshme.
“Qeveria do të propozojë, ne do të diskutojmë, ju do të votoni”, deklaroi ai, duke shënuar një kthesë institucionale që e konsideroi si “një ndarje të re të pushtetit mes ekzekutivit dhe legjislativit”. Ai u bëri thirrje deputetëve të ushtrojnë rolin e tyre të ri dhe të marrin vendime në emër të popullit.
Fjalimi i Lecornu u përshëndet me duartrokitje nga ish-presidenti François Hollande dhe socialistët e tjerë, ndërsa u prit me mërzitje nga Marine Le Pen, e cila pritet të humbasë mundësinë për të rrëzuar qeverinë dhe për të çuar në zgjedhje të parakohshme që mund të sillnin në pushtet Jordan Bardella. Për momentin, ajo dhe aleatët e saj janë të detyruar të rishikojnë strategjinë. /Përshtatur nga “Corriere Della Sera”
Lini një Përgjigje