FLASH
Shkruar nga Pamfleti
Një person i dënuar me vdekje në shtetin amerikan të Karolinës së Jugut, Brad Sigmon, 67 vjeç u pushkatua të premten duke u qëlluar me plumba në gjoks. Ky është pushkatimi i parë në vend që nga viti 2010.
Ai u dënua me vdekje në vitin 2002 pasi dhunoi për vdekje prindërit e ish-të dashurës së tij, David dhe Gladys Larke, me shkop bejsbolli përpara se të tentonte ta rrëmbente atë.
“Ekzekutimi u krye në orën 18:05 nga një skuadër pushkatimi dhe ai u shpall i vdekur nga një mjek në orën 18:08”, tha zëdhënësja Chrysti Shain.
Ky është ekzekutimi i gjashtë i kryer në Shtetet e Bashkuara në vitin 2025, të gjithë të tjerët me injeksion vdekjeprurës, përveç njërit me frymëthithje azoti në Alabama (juglindje), shtet i cili inauguroi në janar të vitit 2024 këtë metodë deri atëherë të re dhe të diskutueshme. Kjo metodë u cilësua nga ekspertët e OKB-së si torturë.
Një shtet tjetër në jug të vendit, Luiziana do të rifillojë ekzekutimet pas një ndërprerjeje 15-vjeçare, duke përdorur gjithashtu frymëthithjen e azotit më 18 mars.
Autoritetet e Karolinës së Jugut caktuan një datë ekzekutimi për Brad Sigmon një muaj më parë. Ligji e bën karrigen elektrike metodën e paracaktuar të ekzekutimit, por i lejon të dënuarit mundësinë e vdekjes me pushkatim ose me injeksion vdekjeprurës.
Tre ekzekutimet e mëparshme në Karolinën e Jugut që nga shtatori – pas një pauze prej më shumë se 13 vitesh – zgjodhën injeksion vdekjeprurës.
Sipas avokatëve të tij, Brad Sigmon zgjodhi mënyrën e pushkatimit pasi ishte i dëshpëruar.
Dënimi me vdekje është hequr në 23 nga 50 shtetet amerikane. Gjashtë të tjerë (Arizona, Kalifornia, Ohio, Oregon, Pensilvania dhe Tenesi) respektojnë një moratorium mbi ekzekutimet me vendim të guvernatorit.
Lini një Përgjigje