FLASH
Shkruar nga Pamfleti
Presidenti iranian Masoud Pezeshkian tha se ka zhvilluar një takim prej dy orësh e gjysmë me Mojtaba Khamenein. Ky është konfirmimi i parë publik se lideri i ri i Republikës Islamike është parë nga një zyrtar i lartë që prej emërimit të tij pas vdekjes së Ali Khameneit.
Gjatë një takimi me përfaqësues të sindikatave dhe tregut, Pezeshkian zbuloi se kishte zhvilluar një bisedë prej rreth dy orësh e gjysmë me Mojtaba Khamenein, megjithëse nuk dha detaje mbi kohën, vendin apo temat e diskutuara gjatë takimit.
“Ajo që më bëri përshtypje më shumë se çdo gjë tjetër në këtë takim ishte mënyra, perspektiva dhe sjellja thellësisht e sinqertë dhe modeste, një qasje që e transformoi atmosferën në një atmosferë të bazuar në besim, qetësi, empati dhe dialog të drejtpërdrejtë”, deklaroi Pezeshkian.
Mojtaba Khamenei mori drejtimin e Republikës Islamike pas vdekjes së babait të tij, Ajatollah Ali Khamenei, i cili sipas raportimeve u vra gjatë sulmeve ajrore amerikane dhe izraelite më 28 shkurt.
Që prej emërimit, lideri i ri iranian nuk është shfaqur publikisht dhe nuk ka publikuar asnjë material audio apo video, duke nxitur spekulime të shumta për gjendjen e tij shëndetësore.
Sipas një raportimi të gazetës “New York Times”, që citonte katër zyrtarë iranianë, Mojtaba Khamenei ka pësuar plagë të rënda gjatë sulmeve dhe i është nënshtruar disa operacioneve në këmbë dhe krahë. Raporti pretendonte gjithashtu se ai kishte vështirësi në të folur për shkak të djegieve serioze në fytyrë dhe buzë.
Edhe Sekretari amerikan i Mbrojtjes, Pete Hegseth, deklaroi më herët se lideri iranian ishte plagosur dhe “me shumë gjasa i shpërfytyruar”, megjithatë autoritetet iraniane nuk kanë konfirmuar zyrtarisht këto pretendime.
Spekulimet janë shtuar edhe më shumë pas publikimit të një murali në Iran ku Mojtaba Khamenei shfaqej përkrah figurave të konsideruara “martirë” të Republikës Islamike, mes tyre babai i tij Ali Khamenei dhe ish-komandanti i Forcës Quds, Qassem Soleimani.
Ndërkohë, agjencia iraniane Tasnim shkaktoi reagime pasi iu referua Mojtaba Khameneit si “udhëheqësi martir i revolucionit”, përpara se ta cilësonte më pas këtë përshkrim si një gabim.
Lini një Përgjigje