FLASH
Shkruar nga Pamfleti
Ministri i Jashtëm i Iranit, Abbas Araghchi, ka paralajmëruar se çdo përpjekje për të sfiduar kontrollin iranian mbi Ngushticën e Hormuzit do të çojë në përshkallëzim të tensioneve në rajon.
Gjatë një vizite zyrtare në Bagdad, Araghchi zhvilloi një takim me homologun e tij irakian, ku në qendër të bisedimeve ishin zhvillimet e fundit në Lindjen e Mesme dhe situata në Ngushticën e Hormuzit, një nga rrugët më të rëndësishme të transportit të naftës në botë.
Sipas "Reuters", ministri iranian theksoi se "rikthimi i trafikut detar në nivelet e para luftës në Hormuz varet vetëm nga Teherani", duke shtuar se "çdo sfidë ndaj mbikëqyrjes iraniane të ngushticës do të rrisë tensionet".
Nga ana tjetër, ministri i Jashtëm i Irakut deklaroi se gjatë takimit kishte nënvizuar rëndësinë e mbajtjes së hapur të kalimit detar dhe i kishte kërkuar Iranit të hiqte bllokadën detare. Edhe shtetet e Gjirit kanë shprehur publikisht qëndrimin se Ngushtica e Hormuzit duhet të mbetet e hapur për lundrimin ndërkombëtar.
Araghchi u ndal edhe te situata në Liban, pas njoftimeve të ushtrisë izraelite për vrasjen e militantëve të Hezbollahut në zonën e Nabatieh, në jug të vendit.
Në deklaratën e tij, ai përsëriti qëndrimin e Teheranit se memorandumi i mirëkuptimit i arritur me Shtetet e Bashkuara parashikon që Izraeli të tërhiqet nga Libani dhe t'i japë fund operacioneve ushtarake në territorin libanez.
Lini një Përgjigje