FLASH
Shkruar nga Pamfleti
Ushtria izraelite ka njoftuar nisjen e një vale të re të sulmeve ajrore në jug të Rripit të Gazës, duke e përshkruar ndërhyrjen si “të gjerë dhe intensive”, me dhjetëra objektiva të goditura brenda një kohe të shkurtër. Sulmet përqendrohen kryesisht në zonat përreth qytetit të Rafahut, në kufi me Egjiptin, ndërkohë që nuk ka ende një bilanc zyrtar mbi viktimat apo dëmet materiale.
Ky përshkallëzim ndodh në një moment kur armëpushimi i brishtë, i arritur më 10 tetor me ndërmjetësimin e presidentit amerikan Donald Trump, është në rrezik serioz të kolapsit. Marrëveshja kishte për qëllim t’i jepte fund mbi dy vjetëve të një lufte shkatërrimtare mes Izraelit dhe Hamasit, e cila kishte lënë mijëra të vrarë dhe Gaza-n në gërmadha.
Forcat izraelite nuk kanë dhënë detaje për objektivat konkrete, por e kanë justifikuar ofensivën si përgjigje ndaj provokimeve të reja nga Hamasi, përfshirë të shtëna me armë dhe granata ndaj trupave izraelite në zonën e Rafahut. Nga ana tjetër, Hamasi ka mohuar çdo përfshirje në incidente të tilla dhe e ka akuzuar Izraelin për thyerje të qëllimshme të armëpushimit.
Lini një Përgjigje