FLASH
Shkruar nga Pamfleti
Në Gaza, një sulm i fundit ndaj tendave të kampit Deir al Balah vrau 4 persona dhe plagosi 2 fëmijë.
Ministria e Shëndetësisë e kontrolluar nga Hamasi ka deklaruar se numri i viktimave që nga fillimi i konfliktit ka kaluar 40 mijë.
OKB e cilëson situatën humanitare në Gaza si “përtej katastrofës”, me mbi 1 milion palestinezë që nuk kanë marrë racionet me ushqim gjatë gushtit.
Ndërkohë, në jug të Gazës ka nisur vaksinimi kundër poliomielitit pasi punonjësit e shëndetësisë përfunduan fazën e parë të fushatës në zonat qendrore të territorit.
“Poliomieliti është çrrënjosur nga të gjitha vendet e botës përveç Afganistanit dhe Pakistanit. Ndaj rikthimi i tij pas 25 vitesh pa asnjë rast në territorin palestinez ka sjellë shumë shqetësim në komunitetin e shëndetit publik dhe tek OBSH-ja gjithashtu, sidomos për fëmijët që mund të mbeten të paralizuar”,- Hanan Balkhy, drejtor rajonal i OBSH-së.
Banorët e Gazës mbeten tej mase të cenueshëm nga sëmundjet infektive, pasi niveli i shkatërrimit të infrastrukturës së territorit i ka lënë komplekset shëndetësore në nevojë për medikamente dhe pajisje mjekësore.
Lini një Përgjigje