FLASH
Shkruar nga Pamfleti
Pierre-Henri Chuet, një ish-pilot i Forcave Ajrore Franceze, i kthyer në yll në YouTube, është subjekt i një hetimi paraprak nga Prokuroria Publike e Parisit për spiunazh të dyshuar për Kinën…
Të paktën prej 6 vitesh, Kina kishte ndërtuar një skemë spiunazhi, përmes të cilës synonte të mblidhte ekspertizën perëndimore të aviacionit. Kjo zbulohet nga një hetim i hapur nga Prokuroria Publike e Parisit me dyshimin e një “spiunazhi në dobi të një fuqie të huaj" dhe "zbulim të një sekreti të mbrojtjes kombëtare". Hetimet po zhvillohen ndaj një ish-piloti të ushtrisë francize, që dyshohet se ka punuar për Kinën.
Ish-piloti ishte nën survejim prej vitesh nga agjencia franceze e sigurisë së mbrojtjes, Drejtoria e Inteligjencës dhe Sigurisë së Mbrojtjes (DRSD), e cila dha alarmin për situatën.
Ish-ushtaraku francez është identifikuar si Pierre-Henri Chuet. Ai është vetëm një nga disa pilotët ushtarakë perëndimorë që kanë punuar në emër të homologëve të tyre në Ushtrinë Çlirimtare Popullore Kineze (PLA) nëpërmjet një sistemi të kamufluar mirë.
Intelligence Online zbuloi fillimisht ekzistencën e kësaj skeme në vitin 2019, më pas në maj 2022 u detajua sistemi që Pekini kishte vendosur për të trajnuar pilotët e tij duke përdorur ekspertizën perëndimore.
Këto sesione trajnimi të fshehta u ofruan nga një kompani e Afrikës së Jugut, e quajtur Test Flight Academy of Afrika e Jugut (TFASA). TFASA rekrutoi ish-pilotë të forcave ajrore perëndimore me paga tejet të larta - disave iu ofruan deri në 30,000 dollarë në muaj - përpara se t'i dërgonte në Kinë për të kryer trajnimin.
Nga Kina, ishte entiteti gjysmë publik Aviation Industry Corporation of China (AVIC), që mori përgjegjësinë për operacionet në terren.
Intelligence Online identifikoi të paktën tre pilotë francezë me përvojë në Rafale, të cilët figurojnë në mesin e konsulentëve të ushtrisë kineze, si dhe disa australianë dhe britanikë.
Organizimi i një trajnimi të tillë ka qenë një nxitje për PLA, e cila po kërkon të marrë ekspertizë dhe informacion mbi kundërshtarët e saj, si dhe të vëzhgojë dhe kuptojë modus operandi dhe rregullat e angazhimit të forcave ajrore perëndimore.
Në tetor 2022, Ministria Britanike e Mbrojtjes lëshoi një paralajmërim për pilotët e saj, veçanërisht ata që operojnë me avionët më të fundit F-35 , duke i bindur ata të mos tundoheshin nga një "bujari" e tillë kineze.
Në vazhdën e kësaj, Uashingtoni deklasifikoi hetimin e tij të parë gjyqësor mbi këtë temë, i cili synonte një të huaj që luante një rol kyç në rrjetin ushtarak kinez, ish-aviatorin detar amerikano-australian Daniel Duggan .
Në vazhdën e kësaj afere, një sërë shtetesh perëndimore janë përpjekur të shtrëngojnë sistemet e tyre ligjore në një përpjekje për të penguar këtë lloj ndihme jomateriale për kundërshtarët strategjikë. /Përshtati Pamfleti/
Lini një Përgjigje