FLASH
Shkruar nga Pamfleti
Amendamenti kyç i reformës zgjedhore u hodh poshtë në Dhomën e Deputetëve me rezultatin 188 vota kundër dhe 187 pro, duke nxjerrë në pah përçarje brenda shumicës qeverisëse.
Qeveria e kryeministres italiane Giorgia Meloni ka pësuar një nga humbjet më të forta parlamentare që nga marrja e pushtetit, pasi amendamenti më i rëndësishëm i reformës së saj zgjedhore u rrëzua në Dhomën e Deputetëve me vetëm një votë diferencë.
Në votimin e fshehtë, 188 deputetë votuan kundër dhe 187 pro, duke sinjalizuar përçarje brenda koalicionit të djathtë. Sipas mediave italiane, rreth 30 deputetë të shumicës nuk respektuan qëndrimin zyrtar të qeverisë dhe votuan kundër ose nuk morën pjesë në votim.
Amendamenti, i propozuar nga partia "Vëllezërit e Italisë" (Fratelli d'Italia), së bashku me Noi Moderati dhe UDC, parashikonte rikthimin e votës preferenciale në zgjedhjet parlamentare. Nëse do të miratohej, qytetarët do të kishin të drejtën të zgjidhnin deri në tre kandidatë nga lista e partisë së tyre, në vend që renditja e kandidatëve të përcaktohej kryesisht nga drejtuesit politikë.
Propozimi ishte pjesë e paketës së reformës zgjedhore të promovuar nga koalicioni i Melonit, i cili synon të zëvendësojë sistemin aktual me një model proporcional të shoqëruar me një bonus mandatesh për koalicionin fitues, nëse ai kalon pragun e parashikuar të votave. Sipas qeverisë, ky mekanizëm do të garantonte stabilitet më të madh politik dhe qeverisës.
Rezultati i votimit shkaktoi reagime të menjëhershme në sallën e Parlamentit, ku deputetët e Partisë Demokratike, Lëvizjes Pesë Yje dhe Aleancës së Gjelbër dhe të Majtë protestuan, ndërsa opozita kërkoi zgjedhje të parakohshme.
Sekretarja e Partisë Demokratike, Elly Schlein, i kërkoi kryeministres të largohej nga detyra.
"Ka ardhur koha të shkoni në shtëpi dhe t'i jepni Italisë një qeveri të aftë të zgjidhë problemet e italianëve. Pranoni dështimin tuaj dhe largohuni", deklaroi Schlein.
Edhe ish-kryeministri Giuseppe Conte e interpretoi rezultatin si një sinjal politik kundër Melonit.
"Shumica i ka hequr besimin kryeministres së saj", tha Conte, duke bërë thirrje për zgjedhje të reja.
Megjithatë, koalicioni qeverisës ka përjashtuar mundësinë që humbja parlamentare të çojë në një krizë politike dhe ka bërë të ditur se do të vazhdojë me reformën zgjedhore.
"Është thelbësore të vazhdojmë me këtë ligj që garanton stabilitetin", deklaroi për Corriere della Sera kreu i grupit parlamentar të Forza Italia, Enrico Costa.
Në të njëjtën linjë u shpreh edhe ministri për Marrëdhëniet me Parlamentin, Luca Ciriani, i cili tha se prioritet mbetet miratimi i projektligjit në Dhomën e Deputetëve dhe dërgimi i tij më pas në Senat, ku synohet të miratohet gjatë muajit shtator.
Vetë Giorgia Meloni pranoi se mungesa e mbështetjes nga një pjesë e aleatëve kërkon "një reflektim", ndërsa në një reagim në rrjetet sociale shkroi: "Ne e provuam. Këneta fitoi përsëri".
Pavarësisht kësaj humbjeje, Meloni pritet të bëhet në shtator kryeministrja me mandatin më të gjatë në Italinë e pasluftës. Megjithatë, votimi i fundit ka nxjerrë në pah tensionet në koalicionin e djathtë, në një kohë kur sondazhet tregojnë një garë gjithnjë e më të ngushtë me aleancën e qendrës së majtë të udhëhequr nga Partia Demokratike dhe Lëvizja Pesë Yje. /Pamfleti
Lini një Përgjigje