FLASH
Shkruar nga Pamfleti 
Sulmet izraelite mbi Gazën kanë vrarë dhjetëra palestinezë në orët e fundit; paralajmërohen bombardime të reja mbi kryeqytetin libanez. Izraeli kërkon të vendosë "rregulla të reja" në rajon, ndërsa Gaza përballet me rrezikun e urisë ekstreme.
Ushtria izraelite ka intensifikuar bombardimet në Gaza, duke vrarë më shumë se 20 palestinezë vetëm gjatë orëve të fundit. Ndërkohë, autoritetet izraelite u kanë kërkuar banorëve të një lagjeje në Bejrut të largohen menjëherë nga shtëpitë e tyre, duke sugjeruar se do të godasin sërish kryeqytetin libanez për herë të tretë që nga armëpushimi i nëntorit me Hezbollah.
Situata në Gaza është përkeqësuar ndjeshëm. Zyrtarët e ndihmës humanitare kanë ngritur alarmin për një krizë të rëndë humanitare, duke paralajmëruar se enklava palestineze po kalon në një situatë urie ekstreme për shkak të bllokadës shkatërrimtare izraelite.
Qeveria në Gaza raporton se deri tani janë vrarë mbi 61,700 palestinezë, ndërsa numri i të plagosurve ka arritur në mbi 117,600 persona. Zyrtarisht janë konfirmuar 52,243 të vdekur, ndërsa mijëra persona të tjerë të zhdukur nën rrënoja supozohen të kenë humbur jetën.
Nga ana tjetër, Izraeli raporton se gjatë sulmit të Hamasit më 7 tetor 2023 humbën jetën 1,139 izraelitë dhe mbi 200 të tjerë u morën peng.
Ndërsa lufta vazhdon, ndërmjetësuesit ndërkombëtarë, veçanërisht Katari dhe Egjipti, janë duke bërë përpjekje për të arritur një armëpushim të ri mes Izraelit dhe Hamasit. Grupi palestinez ka deklaruar se ka paraqitur një “vizion për marrëveshje gjithëpërfshirëse”, e cila përfshin ndërprerjen e luftimeve, shkëmbimin e të burgosurve dhe rindërtimin e Gazës.
Ndërkohë, analisti politik libanez Ali Rizk deklaron se sulmet izraelite ndaj Bejrutit janë përpjekje për të vendosur “rregulla të reja” në rajon. Ai thotë se Izraeli kërkon ta përdorë si pretekst mungesën e ndërhyrjes së shtetit libanez kundër Hezbollahut, edhe pse vetë Presidenti i Libanit, Joseph Aoun, ka deklaruar qartë se çështja e armëve të Hezbollahut nuk mund të zgjidhet me forcë, por përmes dialogut.
“Sipas mendimit tim, Izraeli po përpiqet ta justifikojë sulmin duke pretenduar se autoritetet libaneze janë shumë të buta me Hezbollahun. Por strategjia e vërtetë dhe e padeklaruar e Izraelit është që të imponojë rregulla të reja loje në rajon, pa pasur ndonjë provokim nga Hezbollahu ditët e fundit”, thekson Rizk.
Në Bejrut, mediat lokale raportuan për një sulm paralajmërues të kryer nga dronët izraelitë në zonën që pritet të goditet më rëndë në orët në vazhdim. Pamjet tregojnë tym të madh dhe trafik të rënduar, pasi banorët përpiqen të largohen nga lagjja e kërcënuar nga bombardimet./Pamfleti
Lini një Përgjigje