FLASH
Shkruar nga Pamfleti
Presidenti Donald Trump, 79 vjeç, është ekzaminuar së fundmi për ënjtje në këmbë dhe është diagnostikuar me insuficiencë venoze kronike, njoftoi të enjten Shtëpia e Bardhë.
Sipas zëdhënëses për shtyp, Karoline Leavitt, Trump iu nënshtrua një “kontrolli të plotë, përfshirë studime diagnostikuese të enëve të gjakut”, të kryera nga Njësia Mjekësore e Shtëpisë së Bardhë. Leavitt lexoi një deklaratë të mjekut personal të presidentit, kapiten Sean Barbabella.
Sipas notës së Barbabella-s, “ultratinguj doppler bilateral të gjymtyrëve të poshtme zbuluan insuficiencë venoze kronike (ICD-9), një gjendje e zakonshme, veçanërisht tek individët mbi moshën 70 vjeç”.
Ekzaminimi u krye pasi Trump kishte vënë re “ënjtje të lehtë në këmbët e poshtme” gjatë javëve të fundit.
Zëdhënësja Leavitt theksoi gjithashtu, duke cituar Barbabella-n, se “nuk ka prova për trombozë të thellë venoze apo sëmundje arteriale”, dhe se të gjitha analizat laboratorike të presidentit ishin “brenda kufijve normalë”. Trump iu nënshtrua gjithashtu një ekokardiograme, e cila nuk zbuloi “shenja të insuficiencës kardiake, dëmtimit të veshkave apo sëmundje sistemike”.
Insuficienca venoze kronike është një gjendje në të cilën valvulat në venat e caktuara nuk funksionojnë siç duhet, duke bërë që gjaku të grumbullohet në këmbë. Çdo vit diagnostikohen rreth 150,000 raste të reja, dhe rreziku rritet me moshën. Simptomat mund të përfshijnë ënjtje në këmbë apo kyçet e këmbëve, dhimbje apo ngërçe, variçe, shqetësime apo ndryshime të lëkurës. Trajtimi mund të përfshijë ilaçe ose, në faza më të avancuara, ndërhyrje mjekësore.
Zëdhënësja Leavitt iu përgjigj gjithashtu pyetjeve për shenjat e mavijosura të shfaqura në pjesën e pasme të dorës së presidentit, duke i atribuar ato “shtrëngimeve të shpeshta të duarve” dhe përdorimit të aspirinës.
Lini një Përgjigje