FLASH
Shkruar nga Pamfleti
Autoritetet doganore të Maqedonisë së Veriut kanë sekuestruar 500 mijë euro cash në pikën kufitare të Tabanocit, të fshehura në një minibus që po udhëtonte drejt Tiranës.
Sipas autoriteteve, drejtuesi i automjetit, një shtetas shqiptar me inicialet XH.G., po hetohet për transport të paligjshëm të parave dhe dyshime për pastrim parash. Ndaj tij ka nisur procedimi penal, ndërsa shuma e parave dhe minibusi janë sekuestruar si prova materiale.
Minibusi transportonte shtatë pasagjerë në momentin që u ndalua nga dogana. Gjatë kontrollit të detajuar, autoritetet zbuluan një hapësirë të posaçme të ndërtuar brenda mjetit, ku ishin fshehur paratë, të ndara në 14 qese.
Drejtori i Doganës së Maqedonisë së Veriut, Boban Nikollovski, e cilësoi operacionin si rastin më të madh të kapjes së parave cash në historinë e institucionit.
“Ky është sekuestrimi më i madh i parave cash në historinë e doganave tona. Përpjekja u parandalua falë një operacioni të mirëfilltë të Departamentit Operativ”, deklaroi Nikollovski.
Autoritetet maqedonase po vijojnë hetimet për të zbuluar origjinën e shumës së sekuestruar dhe personat e tjerë që mund të jenë të përfshirë në këtë rast.
Lini një Përgjigje