FLASH
Shkruar nga Pamfleti
Irani i ka bërë thirrje Donald Trump, fituesit të zgjedhjeve të fundit presidenciale në SHBA, të ndryshojë politikën e presionit që ka ndjekur gjatë mandatit të tij të parë kundër Republikës Islamike.
“Trump duhet të tregojë se nuk do të ndjekë më politikat e gabuara të së kaluarës”, tha zëvendëspresidenti iranian për çështjet strategjike, Mohammad Javad Zarif.
Ish-ministri i Jashtëm Zarif, ishte arkitekti i marrëveshjes bërthamore, e cila u nënshkrua në vitin 2015 mes Teheranit dhe komunitetit ndërkombëtar, duke përfshirë Shtetet e Bashkuara të Amerikës.
Por, kjo marrëveshje u sabotua tre vite më vonë, kur Presidenti i atëhershëm Donald Trump tërhoqi vendin e tij prej saj dhe vendosi sanksione të reja të rënda, si pjesë e politikës “presion maksimal” kundër Iranit.
“Si një njeri i llogaritjeve, ai duhet të shqyrtojë përfitimet dhe mangësitë e kësaj politike dhe të vendosë nëse dëshiron ta vazhdojë apo ta ndryshojë këtë politikë të dëmshme”, u shpreh Zarif, duke iu referuar karrierës së Trump, si një biznesmen.
Mandati i parë i Donald Trump u shënua gjithashtu nga vendimi i tij në janar të vitit 2020 për të vrarë në Irak gjeneralin e fuqishëm iranian Qasem Soleimani, arkitektin e strategjisë së ndikimit rajonal të Iranit.
Përmes përfaqësuesit të tij diplomatik Ismail Baghaei, Teherani shprehu shpresën se rikthimi i mundshëm i Donald Trump në Shtëpinë e Bardhë do të mundësojë rishikimin e qasjes së gabuar të së kaluarës, megjithëse nuk u përmend emri i Trumpit.
Lideri i Iranit, Ayatollah Ali Khamenei, i cili ka fjalën e fundit për të gjitha vendimet strategjike, nuk përmendi zgjedhjet presidenciale amerikane në fjalimin e tij të enjten e kaluar.
Trump u shpreh me bindje se nuk ka ndërmend të dëmtojë Iranin, por përkundrazi, ai dëshiron që iranianët të kenë një vend shumë të begatë.
Fitorja e Donald Trump në zgjedhjet presidenciale shënon një moment të ndjeshëm për Iranin, i cili është i përfshirë në luftën në Gaza mes Izraelit dhe Hamasit palestinez, si dhe në përhapjen e konfliktit në Liban ndaj Hezbollahut.
Këto dy grupe mbështeten financiarisht dhe ushtarakisht nga Teherani në luftën e tyre kundër shtetit të Izraelit, të cilin Irani nuk e njeh.
Lini një Përgjigje