FLASH
Shkruar nga Pamfleti
Ushtria izraelite (IDF) ka njoftuar se ka vrarë një anëtar të Hamasit, të cilin e identifikoi si Yousef Ayesh Awad Ramadan, dhe që sipas saj ishte i përfshirë në rrëmbimin e Hersh Goldberg-Polin, Eliya Cohen, Alon Ohel dhe Or Levy gjatë sulmit të 7 tetorit 2023.
Sipas deklaratës së IDF-së, Ramadan shërbente si zëvendëskomandant i një njësie të forcave Nukhba të Hamasit. Ushtria izraelite pretendon se ai u infiltrua në territorin izraelit gjatë sulmit të 7 tetorit dhe mori pjesë në rrëmbimin e pengjeve që ndodheshin në një strehë pranë kryqëzimit Re’im.
IDF deklaroi se Ramadan kishte planifikuar sulme të tjera kundër ushtarëve izraelitë dhe civilëve gjatë luftës në Gaza, duke e konsideruar atë një kërcënim aktiv për forcat që operojnë në territor.
“Para sulmit u ndërmorën masa për të minimizuar dëmet ndaj civilëve, përfshirë përdorimin e municioneve precize dhe mbikëqyrjen ajrore”, thuhet në deklaratën e ushtrisë.
Alon Ohel, i cili sipas raportimeve u lirua në tetor 2025 në kuadër të një marrëveshjeje armëpushimi në Gaza, reagoi pas njoftimit duke falënderuar IDF-në në një postim në Instagram dhe duke kërkuar vazhdimin e operacioneve kundër Hamasit.
Më 16 maj, IDF njoftoi gjithashtu vrasjen e dy anëtarëve të tjerë të Hamasit, Hamer Iyad Muhammad Almatouk dhe Khaled Muhammad Salem Joudeh, në operacione të veçanta në veri të Gazës. Ushtria izraelite tha se ata po përgatitnin sulme kundër forcave izraelite në zonë.
Ndërkohë, më herët gjatë muajit, IDF raportoi vrasjen e Izz ad-Din al-Haddad, një nga drejtuesit ushtarakë të Hamasit. Shefi i Shtabit të IDF-së, gjeneral-lejtnant Eyal Zamir, e cilësoi operacionin si një arritje të rëndësishme ushtarake.
Sipas ushtrisë izraelite, sulmi ndaj al-Haddad u krye pas një periudhe të gjatë mbledhjeje informacioni nga inteligjenca ushtarake dhe me miratimin e autoriteteve qeveritare izraelite.
Lini një Përgjigje