FLASH
Shkruar nga Pamfleti
Darka tradicionale e Korrespondentëve të Shtëpisë së Bardhë do të zhvillohet më 24 korrik, pasi eventi u anulua për shkak të një sulmi me armë që tronditi Uashingtonin.
Presidenti amerikan Donald Trump ka konfirmuar se do të marrë pjesë në aktivitetin e riplanifikuar dhe do të mbajë një fjalim para të pranishmëve.
“Nuk e di nëse do të jap apo jo të njëjtat deklarata mjaft të pakëndshme, të paktën për sa i përket njerëzve të caktuar, por së shpejti do ta zbulojmë. Sidoqoftë, do të jetë një biletë ‘e nxehtë’!”, u shpreh Trump.
Ende nuk është vendosur zyrtarisht se ku do të mbahet aktiviteti. Tradicionalisht, darka organizohej në hotelin Washington Hilton, por shqetësimet e sigurisë pas ngjarjeve të fundit kanë ngritur pikëpyetje mbi përdorimin e të njëjtit ambient.
Vetë Trump ka deklaruar se eventi mund të zhvendoset në hotelin Waldorf Astoria, një pronë që më parë ishte në pronësi të Organizatës Trump.
Ndërkohë, presidentja e Shoqatës së Korrespondentëve të Shtëpisë së Bardhë (WHCA), Weijia Jiang, njoftoi përmes një emaili drejtuar gazetarëve se detajet mbi vendndodhjen, biletat dhe programin do të bëhen publike në ditët në vijim.
Trump mori pjesë për herë të parë si president në darkën e këtij viti dhe kishte kërkuar që ceremonia të riplanifikohej brenda 30 ditëve nga anulimi, afat që tashmë është tejkaluar.
Ngjarja u anulua pas një incidenti të rëndë me armë zjarri. Muajin e kaluar, Cole Tomas Allen, i dyshuari për sulmin, deklaroi në gjykatë se nuk ndihej fajtor për akuzat e ngritura ndaj tij, mes të cilave "tentativa për vrasjen e presidentit", "sulmi ndaj një oficeri federal" dhe vepra të tjera që lidhen me përdorimin e armëve të zjarrit.
Lini një Përgjigje