FLASH
Shkruar nga Pamfleti
Gjatë karrierës së tij, Mandelson u përball me disa skandale që çuan në largimin e tij nga detyra.
Peter Mandelson ka qenë një nga figurat më me ndikim të politikës britanike në tre dekadat e fundit, shpesh duke vepruar në prapaskenë. Ai luajti rol qendror në projektin “New Labour” të Tony Blair, si një nga këshilltarët kryesorë të ish-kryeministrit, dhe më pas mbajti dy herë poste ministrore, në Tregti dhe në Irlandën e Veriut.
Gjatë karrierës së tij, Mandelson u përball me disa skandale që çuan në largimin e tij nga detyra. Në shtator ai u shkarkua nga posti i ambasadorit britanik në Uashington, duke u bërë kështu politikani britanik i larguar tri herë nga poste të rëndësishme publike. Arrestimi i tij në Londër shënon zhvillimin më të fundit në këtë seri ngjarjesh.
Mandelson ka mbajtur gjithmonë marrëdhënie të afërta me qarqe të biznesit dhe figura me ndikim ndërkombëtar. Ai është cituar shpesh për deklaratën e tij se qeveria “New Labour” ishte “plotësisht e qetë me njerëzit që bëhen jashtëzakonisht të pasur”, një formulim që përmbledhte qasjen e asaj periudhe ndaj sektorit privat. Pas largimit nga qeveria britanike, ai shërbeu si Komisioner Evropian për Tregtinë dhe më pas u emërua anëtar i Dhomës së Lordëve me titullin Baron i Foy dhe Hartlepool.
Kryeministri aktual, Keir Starmer, e emëroi Mandelson ambasador në Uashington në një moment delikat për marrëdhëniet me Shtetet e Bashkuara, veçanërisht gjatë presidencës së Donald Trump. Sipas raportimeve, ai luajti rol aktiv në negociatat tregtare mes Londrës dhe Uashingtonit, duke kontribuar në vendosjen e tarifave më të ulëta për Mbretërinë e Bashkuar krahasuar me Bashkimin Evropian. Gjatë kësaj periudhe, ai ndryshoi qëndrimin publik ndaj Brexit-it, megjithëse më parë kishte mbështetur qëndrimin pro-qëndrimit në BE dhe kishte qenë i angazhuar në përpjekjet për të rishikuar rezultatin e referendumit të vitit 2016.
Emri i Mandelson u përmend në një libër urimesh për 50-vjetorin e financierit amerikan Jeffrey Epstein, së bashku me figura të tjera publike. Marrëdhënia e tij me Epstein ishte e njohur prej kohësh, por në shtator mediat publikuan një seri emaileve ku ish-ambasadori e quante Epstein “mikun e tij më të mirë” dhe i shprehte mbështetje përballë akuzave për shfrytëzim seksual të të miturve, duke ofruar ndihmë.
Një ministër anonim e cilësoi përmbajtjen e këtyre emaileve si të papranueshme. Kryeministri Starmer, i cili fillimisht e mbrojti Mandelson në Parlament, vendosi ta largojë menjëherë nga detyra. Në Londër qarkulluan gjithashtu fotografi të tij në shoqërinë e Epstein, të cilat shtuan presionin publik.
Nuk ka pasur akuza publike që të lidhin Mandelson me përfitime seksuale apo me aktivitete të ngjashme me ato që janë përmendur në raste të tjera të profilit të lartë. Sipas raportimeve, marrëdhënia e tij me Epstein lidhej me afërsinë me figura të pasura dhe me ndikim, një rreth ku ai ka operuar shpesh edhe pas tërheqjes nga politika aktive.
Pas largimit nga funksionet qeveritare, Mandelson themeloi kompaninë e konsulencës dhe lobimit Global Counsel. Sipas medias italiane Corriere della Sera, kompania ka shpallur falimentimin si pasojë e skandalit të fundit.
Edhe pas shkarkimit nga posti i ambasadorit, Mandelson vijoi të ishte aktiv në debatin publik, duke dhënë intervista dhe duke shkruar komente në revista politike. Megjithatë, publikimi i dokumenteve dhe materialeve të reja, përfshirë fotografi personale që qarkulluan gjerësisht në media, e përkeqësoi më tej pozitën e tij dhe çoi në arrestimin e tij në Londër.
Lini një Përgjigje