FLASH
Shkruar nga Pamfleti
Izraeli ka vrarë plot 192 gazetarë në gaza...
Një tjetër masakër në Rripin e Gazës ka shënjestruar jo vetëm civilët, por edhe zërin e lirë. Pesë gazetarë u vranë gjatë bombardimeve të ushtrisë izraelite mbi spitalin Nasser në Khan Younis, ku numri total i viktimave arriti të paktën 20 persona.
Mes viktimave janë emra të njohur të medias lokale dhe ndërkombëtare. Sipas burimeve të Reuters dhe AP, ata janë:
Mariam Abu Dagga, freelancere për Associated Press
Mohammed Salama, gazetar i Al Jazeera
Hussam al-Masri dhe Moaz Abu Taha, kameramanë të Reuters
Ahmed Abu Aziz, reporter i Middle East Eye, i cili ndërroi jetë nga plagët e marra pas sulmit
Gjithashtu, fotografi i Reuters, Hatem Khaled, mbeti i plagosur gjatë shpërthimeve.
Sipas dëshmive, një raketë e parë goditi spitalin, ndërsa 10 minuta më pas një tjetër bombë shënjestroi shpëtimtarët dhe gazetarët që kishin mbërritur për të dhënë ndihmë.
Gaza, varri më i madh i gazetarëve
Statistikat janë të frikshme: sipas Komitetit për Mbrojtjen e Gazetarëve (CPJ), vetëm në 22 muajt e fundit janë vrarë 192 gazetarë në Gaza, shifra më e lartë e regjistruar ndonjëherë në një konflikt modern. Ky numër është gati 10 herë më i madh se numri i gazetarëve të vrarë në Ukrainë gjatë së njëjtës periudhë.
Sipas Sky News, bilanci i përgjithshëm i luftës midis Izraelit dhe Hamasit ka çuar në afro 200 gazetarë të vrarë deri sot, duke e kthyer Gazën në zonën më vdekjeprurëse në botë për median.
Netanyahu nën akuzë: Sulm ndaj fjalës së lirë
Organizata ndërkombëtare si Foreign Press Association, Reporters Without Borders dhe CPJ kanë dënuar ashpër sulmet ndaj gazetarëve, duke i cilësuar ato si një strategji për të heshtur dëshmitarët e krimeve të luftës.
Kryeministri Benjamin Netanyahu akuzohet nga vëzhgues ndërkombëtarë se po shënjestron median dhe të drejtën e informimit. Shumë gazetarë të huaj janë ndaluar të hyjnë në Gaza, ndërsa korrespondentët vendas paguajnë me jetë për çdo lajm të dhënë.
Ky është një sulm i drejtpërdrejtë ndaj fjalës së lirë, duke e kthyer profesionin e gazetarit në Gaza në një mision vetëflijimi.
Në mes të rrënojave, fotoja e publikuar nga Reuters me paisjet e kameramanit të vrarë Hossam al-Masri mbetet simbol i kësaj tragjedie. Një çantë e punës, një kamerë e thyer dhe një trup pa jetë – dëshmi se fjala e lirë në Gaza paguhet sot me gjakun e reporterëve. /Pamfleti
Lini një Përgjigje