FLASH
Shkruar nga Pamfleti
Anëtarët e Bordit të Paqes të presidentit amerikan Donald Trump kanë premtuar më shumë se 5 miliardë dollarë (rreth 4.6 miliardë euro) ndihmë për Gazën. Lajmi është bërë i ditur nga vetë Trump përmes një postimi në rrjetin e tij social Truth Social.
Sipas presidentit amerikan, financimi do të shpallet zyrtarisht më 19 shkurt 2026 në Uashington, gjatë një takimi në Institutin e Paqes “Donald J. Trump”.
“Më 19 shkurt 2026, unë do të bashkohem përsëri me anëtarët e Bordit të Paqes në Institutin e Paqes Donald J. Trump në Uashington, D.C., ku do të njoftojmë se shtetet anëtare kanë premtuar më shumë se 5 miliardë dollarë për përpjekjet humanitare dhe të rindërtimit të Gazës dhe kanë angazhuar mijëra personel në Forcën Ndërkombëtare të Stabilizimit dhe Policinë Lokale për të ruajtur sigurinë dhe paqen për banorët e Gazës”, shkroi Trump.
Ai theksoi gjithashtu se është shumë e rëndësishme që Hamasi të vazhdojë angazhimin e tij për demilitarizim të plotë dhe të menjëhershëm. Trump e cilësoi Bordin e Paqes si “organin ndërkombëtar më të rëndësishëm në histori”, duke shtuar se është “nderi im të shërbej si kryetar i tij”.
Trump deklaroi se iniciativa ka “potencial të pakufizuar” dhe kujtoi se tetorin e kaluar kishte publikuar një plan për përfundimin e përhershëm të konfliktit në Gaza, i cili, sipas tij, u miratua unanimisht nga Këshilli i Sigurimit i OKB-së.
Ai shtoi se pas kësaj u lehtësua ndihma humanitare dhe u sigurua lirimi i pengjeve, ndërsa në Davos u prezantua zyrtarisht vizioni i Bordit për Gazën dhe më gjerë, drejt “paqes botërore”.
Lini një Përgjigje