FLASH
Shkruar nga Pamfleti
Rikthimi i ushtrisë izraelite në kështjellën historike Beaufort, në jug të Libanit, ka nxitur debat në Izrael lidhur me efektivitetin e kësaj strategjie dhe koston e saj afatgjatë.
Gjatë një deklarate të dielën, kryeministri Benjamin Netanyahu e përshkroi Beaufort-in si një simbol të heroizmit të ushtarëve izraelitë, por edhe si një kujtesë të ndarjeve të thella që kanë shoqëruar konfliktin ndër vite.
“Kështjella Beaufort është simbol i një beteje heroike për luftëtarët tanë, por gjithashtu simbolizon edhe përçarjen e thellë mes nesh”, tha Netanyahu.
Megjithatë, jo të gjithë e shohin pozitivisht rikthimin e ushtrisë në këtë zonë strategjike. Orna Mizrahi, ish-zëvendësdrejtoreshë në Këshillin e Sigurisë Kombëtare të Izraelit, deklaroi për Associated Press se situata krijon përshtypjen se Izraeli po rikthehet në të njëjtat dilema të së kaluarës.
“Ekziston një ndjesi sikur po bëjmë të njëjtën rrugë përsëri. Shumë njerëz pyesin: ‘Për çfarë?’”, tha ajo.
Sipas Mizrahit, Beaufort mbetet një simbol i dyfishtë për Izraelin. Nga njëra anë përfaqëson suksesin ushtarak të pushtimit të fortesës në vitin 1982, por nga ana tjetër kujton humbjet dhe koston e lartë të mbajtjes së saj deri në tërheqjen izraelite nga Libani në vitin 2000.
Ekspertja beson se Izraeli ka gjasa të heqë dorë në të ardhmen nga kontrolli i fortesës, pavarësisht deklaratave të ministrit të Mbrojtjes, Israel Katz, i cili ka shprehur synimin që zona të mbetet pjesë e përhershme e brezit të sigurisë së Izraelit në jug të Libanit.
Mizrahi argumenton se operacionet ushtarake, megjithëse mund të dobësojnë Hezbollahun, nuk ofrojnë një zgjidhje afatgjatë.
“Po, ne po i godasim ata përmes operacioneve ushtarake, por paralelisht duhet të kërkojmë edhe një zgjidhje politike dhe diplomatike”, theksoi ajo.
Debati vjen në një kohë kur tensionet në kufirin Izrael-Liban mbeten të larta dhe shqetësimet për një përshkallëzim të mëtejshëm të konfliktit vazhdojnë të jenë të pranishme.
Lini një Përgjigje