FLASH
Shkruar nga Pamfleti
Autoritetet iraniane kanë ekzekutuar me varje 29-vjeçarin Erfan Shakurzadeh, student i inxhinierisë ajrore, i akuzuar për spiunazh në favor të CIA-s amerikane dhe shërbimit sekret izraelit Mossad.
Sipas mediave shtetërore iraniane, Shakurzadeh u shpall fajtor për vjedhjen e informacioneve sekrete satelitore nga organizata shkencore ku punonte dhe për transmetimin e tyre tek shërbime të huaja inteligjence.
Regjimi iranian pretendon se studenti, i cili ndiqte studimet pasuniversitare në Universitetin e Shkencës dhe Teknologjisë në Teheran dhe konsiderohej ndër më të talentuarit e brezit të tij, kishte kaluar informacione mbi aktivitetet satelitore tek agjenci të huaja.
Sipas Organizatës për të Drejtat e Njeriut në Iran, Shakurzadeh u arrestua në shkurt të vitit të kaluar dhe u detyrua të nënshkruante një deklaratë pranimi të fajësisë.
Pak para ekzekutimit, studenti thuhet se kishte shkruar një mesazh ku deklaronte se akuzat ndaj tij ishin të fabrikuara, raportoi organizata për të drejtat e njeriut.
Organizata shtoi se Shakurzadeh kaloi nëntë muaj në izolim, gjatë të cilëve iu nënshtrua “torturave të rënda fizike dhe psikologjike”.
Ai është personi i pestë që ekzekutohet nga autoritetet iraniane që prej nisjes së luftës në shkurt, sipas organizatave monitoruese të të drejtave të njeriut.
Lini një Përgjigje