FLASH
Shkruar nga Pamfleti
Lajme të këqija për politikanët shqiptarë dhe të rajonit. SHBA shumë shpejt do të zgjerojë listën “nongrata” për “mamuthët” e korrupsionit.
Në vazhdën e emergjencës kombëtare, të shpallur me urdhër ekzekutiv më 26 qershor të vitit 2001 lidhur me Ballkanin Perëndimor, pas kërcënimeve të vazhdueshme të sigurisë, paqes, por edhe korrupsionit alarmant, e cila është zgjatur rishtaz, pritet zgjerimi i të ashtuquajturës Lista e Zezë me emra të tjerë politikanësh të rajonit, përfshirë Serbinë, Malin e Zi, Bosnjë-Hercegovinën, Maqedoninë e Veriut dhe Kosovën, por edhe Shqipërinë.
Kështu shprehet agjencia e lajmeve INA, teksa citon dokumentin ku shkruhet: “veprimet e personave që kërcënojnë paqen dhe përpjekjet ndërkombëtare për stabilizim në Ballkanin Perëndimor” dhe situata aktuale në këtë rajon “paraqesin një kërcënim të pazakontë dhe të jashtëzakonshëm për sigurinë kombëtare dhe politikën e jashtme të Shteteve të Bashkuara”.
Në 8 qershor të vitit 2021, Shtetet e Bashkuara zgjeruan fushëveprimin e kësaj emergjence me arsyetimin se rajoni është përballur gjatë dy dekadave të fundit, me korrupsion dhe veprime që pengojnë marrëveshjet e arritura pas luftës.
Ambasadorët amerikanë në rajonin e Ballkanit vazhdimisht kanë paralajmëruar për zgjerimin e listës së zezë për të gjithë ata që kërcënojnë dhe pengojnë përpjekjet ndërkombëtare për stabilizimin rajonal.
Nëntorin e vitit të kaluar, listës në fjalë iu shtuan 10 individë, teksa shpallej një raund sanksionesh ekonomike në Ballkan, dhe individët e sanksionuar ishin nga Bosnja dhe Hercegovina, Mali i Zi, Maqedonia e Veriut dhe Serbia.
Lini një Përgjigje