FLASH
Shkruar nga Pamfleti
Vijon të mbetet mister vrasja e dyfishtë e ndodhur në një kamping në Finikounda (Greqi), ku viktima të një sulmi me armë mbeti pronari i kampingut, 68-vjeçari grek, dhe një ndihmës i tij, 60-vjeçar shqiptar.
Mediat greke raportojnë se mëngjesin e sotëm u paraqit para organeve ligjzbatuese i afërmi i pronarit grek të kampingut.
Sipas burimeve të policisë, ai mbërriti me avokatin e tij, pa u dhënë më shumë informacion në lidhje me arsyen e paraqitjes së tij.
Ende nuk është sqaruar nëse ai do të deklarojë përfshirjen e tij në vrasjen e dyfishtë. Kujtohet se autori i vrasjes së dyfishtë në kampingun e Finikoundës është ende në arrati.
Policia po shqyrton mundësinë që autori të ketë pasur një bashkëpunëtor .
Sipas informacioneve, policia ka në duar një video që duket se tregon një motoçikletë me dy persona që mbërrijnë në zonë, pak para vrasjes. Vlerësohet se bashkëpunëtori i dyshuar mund të ketë zbritur në një moment pranë kampingut dhe të jetë larguar në këmbë, ndërsa autori ka vazhduar vetëm në motoçikletë.
Hetimi vazhdon, ndërsa po krahasohen pamje filmike të siguruara, me qëllim krahasimin e lëvizjeve të tyre dhe konfirmimin nëse autori ka vepruar ose jo i vetëm.
Autoritetet nuk e përjashtojnë mundësinë që ky të jetë një "kontratë vdekjeje", prandaj po krahasojnë dy testamente që lidhen me rastin, duke kërkuar për persona të mundshëm "të pakënaqur" që mund të kenë pasur një motiv. Autori i krimit konsiderohet ose i përfshirë drejtpërdrejt me pronarin e kampingut, ose një ekzekutor amator që është paguar për aktin.
Autoritetet po shqyrtojnë gjithashtu një telefonatë të bërë në kohën e vrasjes nga kampingu - ndoshta, sipas vlerësimeve, një telefonatë konfirmimi nga autori i krimit pas ekzekutimit.
Si ndodhi vrasja e dyfishtë në kamping?
Kujtohet se vrasja ndodhi mbrëmjen e 5 tetorit në një kamping në Finikounda, kur autori, pasi kishte mbuluar fytyrën, hyri me forcë në recepsionin ku ndodhej pronari 68-vjeçar me kujdestarin e tij 60-vjeçar dhe mikun e tij të vjetër.
Personi i armatosur qëlloi me gjakftohtësi pronarin , duke e plagosur për vdekje, dhe më pas vrau mikun e tij, i cili u përpoq të arratisej. Në vrasjen e dyfishtë ishte i pranishëm edhe nipi i pronarit, i cili arriti të arratisej.
Lini një Përgjigje