FLASH
Shkruar nga Pamfleti
Sot shënohen 30 ditë nga nisja e protestave të përditshme para Kryeministrisë, një lëvizje qytetare që nisi si kundërshtim ndaj projektit të zhvillimit në Zvërnec dhe që me kalimin e javëve është shndërruar në një revoltë më të gjerë kundër qeverisë dhe klasës politike.
Në të njëjtën ditë, Policia e Tiranës njoftoi procedimin penal të 31 qytetarëve për tubimin e zhvilluar një ditë më parë në kryeqytet. Sipas policisë, ata dyshohen për veprat penale "Organizimi dhe pjesëmarrja në grumbullime e manifestime të paligjshme", "Prishja e qetësisë publike" dhe "Pengimi i qarkullimit të mjeteve të transportit".
Në njoftimin zyrtar thuhet se procedimi është kryer në vijim të veprimeve procedurale për protestën e djeshme, ndërsa materialet i janë referuar Prokurorisë për veprime të mëtejshme.
Personat e proceduar janë: Sh. B., B. K., A. J., V. D., A. K., L. K., R. S., I. Rr., S. E., M. Y., J. S., E. L., I. Gj., F. H., I. M., K. P., R. Sh., E. Q., B. S., A. N., A. D., F. H., Xh. P., G. P., Sh. G., I. Xh., D. D., A. K., A. R., R. D. dhe A. K.
Protestat para Kryeministrisë kanë vijuar çdo ditë gjatë muajit të fundit. Ato nisën pas kundërshtimeve ndaj projektit në Zvërnec, por më pas u zgjeruan në kërkesa kundër korrupsionit, qeverisë dhe asaj që protestuesit e cilësojnë si sistem politik të dështuar.
Lini një Përgjigje