FLASH
Shkruar nga Pamfleti
Ju ftojmë të ndiqni Edicionin Informativ me zhvillimet kryesore nga vendi, rajoni e bota deri në këtë orë, ku ndër të tjera veçojmë:
Mbledhja e grupit parlamentar të Partisë Socialiste ka shkaktuar lëkundje në kupolën e partisë, ndërsa spekulohet për vendimin e kryeministrit Edi Rama mbi largimin nga politika. Takimi, që pritet të zgjasë pesë orë, do të përcaktojë rrugën e tij politike dhe reformat e brendshme.
Nga ana tjetër, lëvizja qytetare “Shqipëria Bëhet” ka paralajmëruar protestë për nesër para Kryeministrisë, duke akuzuar qeverinë për lidhje me kartelet e drogës dhe abuzime të tjera të regjimit.
Në sistemin e drejtësisë, Gjykata Kushtetuese i dha të drejtë ish-kryeministrit Sali Berisha, duke konstatuar se mbajtja e tij nën arrest shtëpie ka zgjatur tej mase, ndërsa Apeli i GJKKO rrëzoi kërkesën për heqjen e sekuestros së pasurive të tij, vendim i marrë nga gjyqtari Engert Pëllumbi.
Në fushën kulturore, deputetja Ina Zhupa kritikoi Akademinë e Shkencave për fjalorin e ri të gjuhës shqipe, duke e quajtur përshkrimin e fjalës “vajzë” si maskilist.
Një ngjarje e rëndë ndodhi në Dajlan, ku një 18-vjeçare humbi jetën pasi makina, me shpejtësi të madhe dhe drejtues të dehur, doli nga ura. Tre të tjerë mbetën të plagosur.
Në gjyqësor, seanca për rastin “Banjska” vazhdon për 42 të akuzuar për sulmin e njësisë speciale, me procedura të veçuara për tre prej tyre.
Arena ndërkombëtare sjell lajme nga SHBA, ku FBI ka stacionuar një agjent special dhe një analist në Kosovë, ndërsa miqtë e Trump mbërritën në Bosnje për një marrëveshje 200 milionë dollarë, duke sfiduar ndikimin rus në Ballkan. Në Hungari, liderët e ekstremit të djathtë mbështesin Viktor Orbanin, mik të afërt të Putinit.
Tensionet SHBA–Danimarkë për Groenlandën po çojnë në një zgjidhje të mundshme: krijimin e misionit të NATO-s “Roja e Arktikut”.
Nga sporti, Rei Manaj, lojtari më i paguar i Kombëtares, largohet nga Arabia Saudite drejt Kinës, duke siguruar 4 milionë euro në sezon.
Lini një Përgjigje