FLASH
Shkruar nga Pamfleti
Pas reshjeve intensive të shiut që përfshinë vendin gjatë javës së kaluar, situata në pjesën më të madhe të territorit ka shënuar përmirësim, pas dëmeve të shkaktuara nga përmbytjet.
Prefektura e Shkodrës ka bërë një përditësim mbi gjendjen në qark. Në zonën e Dajçit, në bashkinë Shkodër, niveli i ujit ka rënë, ndërsa edhe në aksin rrugor të Obotit vërehet tërheqje e ujit, megjithëse ende ka prezencë prej rreth 20 deri në 30 centimetra.
Lëvizja e banorëve në zonat e prekura vazhdon të kryhet me mjete me kalueshmëri të lartë, të mbështetura nga pesë efektivë të Forcave të Armatosura.
Në bashkitë Vau Dejës, Malësi e Madhe, Pukë dhe Fushë Arrëz, autoritetet raportojnë se situata mbetet e qëndrueshme dhe nën kontroll. Ndërkohë, qarkullimi në akset Qafë Mali–Fierzë dhe K/Hadroj–Q/Bënë zhvillohet me goma dimërore ose zinxhirë, për shkak të pranisë së dëborës.
"Në territorin e Bashkisë Shkodër, në zonën e Dajçit vërehet rënie e nivelit të ujit, ndërsa te “Urrelat e Shirqit” nuk ka më prezencë uji. Aksi rrugor i Obotit vijon të ketë prezencë uji rreth 20–30 cm, por me tendencë rënieje të vazhdueshme. Transporti i banorëve në zonat e prekura vijon të realizohet nga Regjimenti i Këmbësorisë së Veriut, me një automjet me kalueshmëri të lartë dhe 5 efektivë të Forcave të Armatosura.
Në territorin e bashkisë Vau Dejës, Malësi e Madhe, Pukë dhe Fushë Arrëz situata paraqitet e qëndrueshme dhe nën kontroll. Nuk raportohen problematika apo situata emergjente.
Sipas të dhënave të Drejtorisë së Ujitjes dhe Kullimit Lezhë, nivelet e ujit në pikat monitoruese vijojnë të jenë nën kuotat kritike. Niveli i lumit Drin në Bahçallëk është në kuotën 7.2 m, ndërsa lumi Buna regjistrohet në kuotën 8.30 m në Pazar dhe 6.40 m në Dajç. Hidrovoret e Velipojës vijojnë të funksionojnë normalisht në kuotën -1.90 m dhe punojnë në kapacitet të plotë, duke garantuar menaxhimin e prurjeve.
Nga DRV Shkodër raportohet se nuk ka probleme me qarkullimin rrugor. Në akset malore rekomandohet qarkullimi me goma dimërore dhe/ose zinxhirë.
Kontraktorët e Mirëmbajtjes Rrugore
Qarkullimi në akset Qafë Mali – Fierzë dhe K/Hadroj – Q/Bënë kryhet me goma dimërore/zinxhirë.
Akset rrugore Dedaj–Razëm, Bogë–Qafë Thore-Theth dhe Hani Hotit-Vermosh janë të kalueshme, por kërkohet respektim rigoroz i rregullave të qarkullimit, sinjalistikës dhe përdorimi i gomave dimërore ose zinxhirëve.
Institucioni i Prefektit të Qarkut Shkodër, në bashkëpunim me strukturat përgjegjëse, vijon të jetë në terren, duke monitoruar në mënyrë të vazhdueshme situatën.", thuhet në njoftim.
Lini një Përgjigje