FLASH
Shkruar nga Pamfleti
Ju ftojmë të ndiqni Edicionin Informativ me zhvillimet kryesore nga vendi, rajoni e bota deri në këtë orë të pasdites, ku ndër të tjera veçojmë:
Nancy VanHorn, e ngarkuara me Punë e SHBA-së në Tiranë, po fokusohet te Kuvendi para sesionit të ri më 19 janar. Ajo zhvilloi takime me drejtuesit e PS dhe PD, Taulant Ballën dhe Gazment Bardhin, si dhe me Kryeparlamentarin Niko Peleshi. Diskutimet vijnë pas kritikave të opozitës për sesionin e kaluar dhe paralajmërimeve për protesta, ndërsa Kuvendi përgatitet për reforma zgjedhore dhe territoriale.
SPAK po heton financimin e Kuvendit të Rithemelimit të PD-së më 11 dhjetor 2021, ku Sali Berisha u rizgjodh kryetar. Hetimi përfshin ish-Kryeministrin, familjarët dhe deputetë të tjerë, ndërsa u pyetën Belind Këlliçi dhe Indrit Hoxha për burimet e fondeve të përdorura.
Në Gjykatën e Posaçme, seanca për dosjen “Buka” ndaj ish-zëvendëskryeministrit Arben Ahmetaj u shty për 27 janar. Ahmetaj kërkon të marrë pjesë me video-konferencë dhe mohon akuzat për shpërdorim detyre në privatizimin e kompanisë.
Prokuroria e Durrësit ka sekuestruar dokumente për hidrovorin e ri në Porto Palermo pas përmbytjeve që dëmtuan banesa dhe rrugë. Hetimi po shqyrton nëse ka pasur shkelje ligjore ose pakujdesi nga institucionet shtetërore, duke përfshirë edhe humbjen e një punonjësi të Ndërmarrjes Komunale.
Shoqata e Gjyqtarëve reagoi kundër ndryshimeve në ligjin për statusin e gjyqtarëve dhe prokurorëve, duke paralajmëruar cenim të pavarësisë së gjyqësorit dhe uzurpim të pushtetit të KLGJ-së.
Altin Ndoci, i arrestuar në operacionin “Plumbi i Artë”, u arratis nga Spitali i Durrësit. Ai sulmoi një efektiv dhe u largua me një “Audi A7” që e priste jashtë, duke sjellë pezullimin e zinxhirit komandues të Burgjeve të Durrësit.
Ndërkohë, Aeroporti i Vjenës është paralizuar nga akulli, duke shkaktuar anulime dhe devijime fluturimesh, përfshirë udhëtarët nga Shqipëria.
Në botë, ish-kryeministri i Gjeorgjisë, Irakli Garibashvili, u dënua me 5 vjet burg dhe konfiskim të pasurive për pastrim parash.
Në Iran, mbi 2,000 protestues u vranë gjatë demonstratave kundër regjimit, ndërsa Izraeli deklaroi gatishmëri për mbrojtje, duke theksuar se protestat janë çështje e brendshme iraniane.
Në sport, shorti i Kupës së Shqipërisë përcaktoi çerekfinalet: Tirana – Dinamo, Partizani – AF Elbasani, Teuta – Egnatia dhe Vllaznia – Bylis. Ndeshjet e para zhvillohen më 11 shkurt dhe kthimi më 4 mars.
Lini një Përgjigje