FLASH
Shkruar nga Pamfleti
Gazetari Lutfi Dervishi ka kritikuar mënyrën se si po zhvillohet aksioni opozitar në Shqipëri, duke theksuar se mungon qartësia, konsistenca dhe një zgjidhje reale politike.
I ftuar në emisionin “Off the Record”, Dervishi u shpreh se protestat dhe kauzat aktuale po konsumohen pa prodhuar rezultat.
Sipas tij, mbështetësit e opozitës kanë të drejtë të protestojnë, por problemi qëndron te politizimi i skajshëm i çdo nisme.
“Çdo gjë kthehet në garë se kush flet i pari, kush e mban protestën, kush e bëri ftesën. Kjo e zbraz çdo lëvizje nga përmbajtja”, tha Dervishi.
Ai vlerësoi disa forma alternative rezistence politike jashtë boshtit tradicional opozitë-pozitë, duke përmendur partitë e reja, sipas tij, tregojnë më shumë qëndrueshmëri dhe konsistencë.
Dervishi solli si shembull “Lëvizjen Bashkë”, e cila, sipas tij, kërkon ndryshim jashtë sistemit aktual politik dhe nuk bën dallim mes mazhorancës dhe opozitës, duke i konsideruar të dyja pjesë të së njëjtës klasë politike që ka konsumuar besimin publik.
Megjithatë, problemi kryesor, sipas Dervishit, është mungesa e një emëruesi të përbashkët dhe e një vizioni të qartë që t’i bashkojë të gjitha këto iniciativa.
“Kemi inflacion kauzash, inflacion skandalesh, por nuk kemi inflacion zgjidhjesh”, u shpreh ai.
Lini një Përgjigje