FLASH
Shkruar nga Pamfleti
Shqiptarët janë të lodhur nga premtimet boshe dhe lojërat e vjetra politike. Ata meritojnë një opozitë që lufton për ta, jo një elitë që hesht për interesa personale.
Zgjedhjet parlamentare të 11 majit 2025 vulosën një realitet shqetësues për demokracinë shqiptare; Partia Socialiste e Kryeministrit Edi Rama fitoi një mazhorancë të frikshme me 83 mandate në parlamentin 140-vendesh, duke siguruar një pushtet pothuajse absolut. Nga ana tjetër, Partia Demokratike e Sali Berishës siguroi vetëm 50 mandate, ndërsa 7 të tjerat shkuan te partitë e vogla. Por përtej shifrave, ky rezultat shpalos një të vërtetë të hidhur: Shqipëria ka mbetur pa opozitë reale.
PD-ja, nën drejtimin e një lideri të sanksionuar ndërkombëtarisht dhe të konsumuar politikisht, jo vetëm që nuk arriti të ofrojë alternativë, por duket se është futur në një bashkëjetesë të heshtur me pushtetin. Retorika e saj e stërpërdorur dhe dyshimet për marrëveshje të fshehta me Ramën, e kanë shndërruar PD-në në një fasadë, jo një kundërshtar. Partitë e reja, megjithëse me energji pozitive, janë të përçara dhe pa strukturë për të përballuar makinerinë politike të PS-së.
Në këtë vakum opozitar, shpresa për një kontroll të pushtetit vjen paradoksalisht nga jashtë; më saktë nga Uashingtoni. Prej më shumë se dy vitesh, Shqipëria nuk ka një ambasador të SHBA-ve, një mungesë që ka lejuar qeverinë të konsolidojë pushtetin pa presionin e zakonshëm ndërkombëtar. Edhe pse Ambasada Amerikane ka mbrojtur vijimisht transparencën dhe luftën kundër korrupsionit, mungesa e një ambasadori të plotfuqishëm ka kufizuar ndikimin real në skenën politike shqiptare.
Administrata e Presidentit Donald Trump është në proces reformimi të politikës së jashtme dhe pritet që deri në shtator të emërojë një ambasador në Tiranë. Një përfaqësues i fuqishëm amerikan në Shqipëri mund të jetë “opozita” e vetme reale në kushtet aktuale, duke imponuar llogaridhënie dhe duke ruajtur balancat demokratike.
Shqiptarët janë të lodhur nga premtimet boshe dhe lojërat e vjetra politike. Ata meritojnë një opozitë që lufton për ta, jo një elitë që hesht për interesa personale. Deri atëherë, mbetet të shpresohet që diplomacia amerikane të rikthejë peshoren në një vend ku drejtësia dhe demokracia janë në buzë të greminës./Pamfleti
Lini një Përgjigje