FLASH
Shkruar nga Pamfleti
I ftohti siberian ka mbërritur edhe në Shqipëri ku reshjet e borës kanë rënë orët e fundit në veri dhe në juglindje të vendit duke shkaktuar probleme. Ulje temperaturash, mungesë e energjisë elektrike dhe bllokim rrugësh regjistrohen në të gjithë vendin, ndërkohë qarqet problematike janë Kukësi, Dibra, Shkodra edhe Korça.
Sipas të dhënave më të fundit në qarkun e Kukësit, trashësia e borës në zonat e thella malore ka kaluar mbi 20 cm, por rrugët nacionale kanë qenë të qarkullueshme me zinxhirë. Mungon energjia në njësitë administrative Shishtavec, Topojan, Zapod, Malzi, Kolsh, Surroj, Ujmisht, Bushtricë, Grykë-Çajë, Kalis dhe Arrën, bashkia Kukës; njësive administrative Golaj dhe Gjinaj, bashkia Has; njësive administrative Tropojë e Vjetër, Bytyç dhe Llugaj, bashkia Tropojë.
Edhe prefekti i Kukësit, Granit Gjana ka dhënë detaje ne lidhje me situatën e krijuar nga reshjet e borës në këtë qark
Në qarkun e Dibrës sasia e reshjeve të borës ka qenë më e madhe. Është arritur të zhbllokohet rruga e Arbrit, bypassi-Qafë Murrizë, e cila ditën e djeshme u bllokua për shkak të reshjeve të dendura të dëborës. Gjithashtu të kalueshme janë dhe akset rrugore Peshkopi-Maqellarë- Bulqizë; Bulqizë - Ura Vashës-Klos; Klos-Burrel-Ulëz.
Po punohet nga grupet në terren në disa akse të zonave të thella të qarkut, për kthimin në normalitet të rrugëve, por edhe të energjisë elektrike, por për shkak të pranisë së akullit ndërhyrja bëhet më e vështirë.
Në qarkun e Korçës, reshjet e borës filluan në orët e mbrëmjes së shtunës, por më pas intensiteti i tyre ka rënë. Reshjet janë shoqëruar dhe me erë të fortë. Trashësia e dëborës ka arritur 5-10 cm. Ka pasur lëvizje të shtuar të automjeteve në rrugën turistike Boboshticë-Dardhë. Nga era e fortë ka pasur ndërprerje të energjisë elektrike në bashkinë Pogradec, Devoll dhe Maliq, por grupet e punës së OSHEE janë në terren, për të rivendosur lidhjet.
Në qarkun e Shkodrës, reshjet e borës të rëna në zonat malore të bashkisë së Shkodrës, Malësi e Madhe dhe Fushë-Arrëz kanë bërë që në disa akse të kalohet me vështirësi dhe me zinxhirë për shkak të prezencës së dëborës dhe ngricave.
Ne Vlorë, ulja e temperaturave ka sjellë dhe reshjet e borës gjatë natës në Llogara. Ndërkohë mësohet se nuk ka vështirësi në qarkullimin e automjeteve. Rruga paraqitet e kalueshme dhe nuk ka probleme. Borëpastrueset kanë pastruar dhe kripësuar rrugën duke mos u krijuar problematika në qarkullim e automjeteve.
Në qarkun e Elbasanit. Në akset rrugore Elbasan-Qafë Thanë, Gramsh-Moglicë, Elbasan-Gjinar, Librazhd-Steblevë ka pasur prani inertesh.
Lini një Përgjigje