FLASH
Shkruar nga PamfletiNë ditën e parë si drejtues i SPAK, Klodian Braho ka mbërritur në Kuvend për mbledhjen që do të mbahet për imunitetin e Ballukut.
Kuvendi i Shqipërisë do të shqyrtojë sot kërkesën e Prokurorisë së Posaçme për të hequr imunitetin e deputetes Belinda Balluku, që njëkohësisht është edhe zëvendëskryeministre dhe ministre e Infrastrukturës dhe Energjisë.
Trupa e prokurorëve të SPAK ka mbërritur tashmë në Kuvend, ku do të paraqesë pretendimet para Këshillit të Mandatave.
Me dy prokurorët e çështjes, Dritan Prençi dhe Dorina Bejko është edhe kreu i ri i SPAK, Klodian Braho, i cili është në ditën e parë të mandatit të tij si drejtues i institucionit.
Në relacionin e dorëzuar në Kuvend për heqjen e imunitetit të Ballukut, SPAK ka renditur edhe arsyet se përse kërkon arrestimin e saj.
Në mbledhjen e sotme, zv.kryeministrja ka të drejtë të paraqitet vetë ose me avokat mbrojtës për t’u mbrojtur.
Rregullorja e Kuvendit nuk parashikon një afat se kur duhet të mbyllet shqyrtimi ndërsa nga mbledhja e fundit e Këshillit, ka maksimumi dy javë kohë për hartimin e raportit, i cili duhet të votohet në seancën e parë plenare.
Një ditë më parë, Apeli i GJKKO-së la në fuqi masën e ndalimit të daljes jashtë shtetit për Ballukun, ndërkohë që nuk mori në shqyrtim ankesën për pezullimin nga detyra, për t’i dhënë kohë Gjykatës Kushtetuese të shprehet mbi ankimin e kryeministrit Rama.
Lini një Përgjigje