FLASH
Shkruar nga Pamfleti
Gjykata e Apelit ka ashpërsuar masat e sigurisë për disa nga ish-zyrtarët, që përballen me akuzat e shpërdorimit të detyrës, lidhur me legalizimin e ndërtimeve pa leje në zonën e njohur si ‘Rana e Hedhun” në Shëngjin të Lezhës.
Masat e sigurisë u rishqyrtuan nga Apeli pas ankimit të bërë nga Prokuroria, ndaj vendimit të Gjykatës së Shkallës së Parë.
Kështu Apeli vendosi për ish-drejtorin e Agjencisë Shtetërore të Kadastrës, Gentian Malotaj, si dhe për përgjegjësin dhe ish-përgjegjësin e legalizimeve, Artmir Maxhuni dhe Artur Shabaku, masat e sigurisë “Arrest në burg”, për veprën penale “Shpërdorim detyre”.
Ndërsa për inxhinierët Luiza Bala dhe Hekuran Xhina, Gjykata e Apelit ka ndryshuar vendimin e Gjykatës së Lezhës nga masat “detyrim paraqitjeje” dhe “ndalim për të dalë jashtë shtetit”, në masën e sigurisë “arrest në shtëpi”, për veprën penale të “Falsifikimit të dokumenteve”.
Ndërkohë, për dy ish-drejtuesit e Inspektoratit të Mbrojtjes së Territorit në Lezhë, Flori Gjini dhe Kol Malaj, janë lënë në fuqi masat e sigurisë “ndalim për të dalë jashtë vendit”.
Gjithashtu, është lënë në fuqi masa e sigurisë “arrest në shtëpi” për Pjetër Tuçin, i cili akuzohet për veprën penale “Ndërtim i paligjshëm”.
Këta persona dyshohet se janë implikuar në një rast të ndërtimit të paligjshëm në zonën e Ranës së Hedhun në Shëngjin, ku hetimet e Prokurorisë së Lezhës, në kuadër të procedimit penal nr. 135 të vitit 2025, kanë zbuluar se janë kryer ndërtime pa leje dhe më pas janë legalizuar në kundërshtim me ligjin.
Deri në këtë fazë të hetimeve, janë vënë nën sekuestro preventive katër objekte, ndërsa veprimet e organit të akuzës vijojnë për dokumentimin e rasteve të tjera të kësaj natyre në zonën turistike të Shëngjinit.
Lini një Përgjigje