FLASH
Shkruar nga Pamfleti
Presidenti Bajram Begaj ka uruar të gjithë besimtarët bektashinj për festën e Sulltan Novruzit. Në një mesazh të postuar në rrjetet sociale, Kreu i Shtetit shkruan se kjo ditë e shenjtë vjen së bashku me pranverën.
“Gëzuar Sulltan Novruzin, të dashur besimtarë bektashinj!
Kjo ditë e shenjtë, që vjen së bashku me pranverën, sjelltë begati e mirësi në çdo vatër tuajën dhe të çdo shqiptari!”, shkruan Begaj.
Festa që simbolizon rilindjen
Nevruzi, i njohur edhe si Nowruz, Novruz, Navruz, Nooruz, Nevruz ose Nauryz, që do të thotë “ditë e re” në persisht, është shumë më tepër se thjesht fillimi i një viti të ri, është një festë e lashtë e jetës, rilindjes dhe triumfit të dritës mbi errësirën. Me rrënjë që shtrihen mbi 3000 vjet në epokën e Zoroastrianizmit, Novruzi paralajmëron ardhjen e pranverës dhe festohet në ekuinoksin e pranverës.
Në këtë ditë, përveç riteve fetare, besimtarët bektashinj shkëmbejnë edhe vizita e dhurara me njëri-tjetrin. Gjithashtu tryezat shtrohen si për festë, ku nuk mungon byreku me monedhë, jeshillëqet, mishi i pjekur dhe sultjashi. Kjo ëmbëlsirë në bazë të saj ka qumështin, që simbolizon qumështin e nënës, orizin që simbolizon bollëkun dhe sherbetin që merret i kënduar në teqe.
Sekretari i përgjithshëm i OKB-së, António Guterres, në një shënim të tijin, në faqen online të Organizatës së Kombeve të Bashkuara, shkruan: “Ndërsa bota përtërihet këtë pranverë, le të kujtojmë se çdo vit i ri dhe çdo ditë, është një shans për një fillim të ri; një shans për të bërë gjërat ndryshe; një mundësi për të ndërtuar një botë më të mirë”.
Dita e Novruzit bashkon kultura të ndryshme në të gjithë Iranin, Azinë Qendrore, Kaukazin, Ballkanin dhe më gjerë, duke ofruar zakone dhe vlera të pasura të zakoneve.
Origjina e Novruzit mund të gjurmohet në perandorinë e lashtë persiane dhe në kalendarin Zoroastrian, ku shënonte një nga ditët më të shenjta të vitit. Fillimisht një kohë e shenjtë për të festuar rilindjen e natyrës, Novruzi evoluoi gjatë shekujve në një festë laike të përqafuar nga komunitete të shumta etno-gjuhësore dhe kulturore.
Sot, Novruzi festohet nga njerëz me prejardhje të ndryshme fetare dhe kulturore, duke reflektuar një dëshirë universale për rinovim, paqe dhe prosperitet. Njohja ndërkombëtare nga UNESCO dhe Kombet e Bashkuara nënvizon rëndësinë e saj si një ngjarje kulturore unifikuese në botën tonë gjithnjë e më të ndërlidhur.
Lini një Përgjigje