FLASH
Shkruar nga PamfletiSot pritet të mbahet në GJKKO edhe seanca paraprake për kalimin ose jo të dosjes për gjykim, pas tentativave të ndryshme për zvarritje.
Kreu i PD, Sali Berisha do të shkojë sot në SPAK për zbatimin e masës së sigurisë detyrim paraqitje, në orën 8.30, për aferën “Partizani”.
Seanca e mëparshme gjyqësore e mbajtur më 24 prill ndaj Sali Berishës, Jamarbër Malltezit dhe Andia Pustinës u shty, pasi mbrojtja kërkoi përjashtimin e gjyqtares Fjorela Davidhi, duke e akuzuar për mungesë paanësie.
Megjithatë, kërkesa u refuzua nga Gjykata e Posaçme kundër Korrupsionit dhe Krimit të Organizuar më 28 prill, duke i hapur rrugë vijimit të gjykimit nga e njëjta trupë gjyqësore.
Gjyqi ndodhet tashmë në muajin e gjashtë të zhvillimit, që nga seanca e parë paraprake më 24 tetor 2023, dhe është karakterizuar nga shtyrje të njëpasnjëshme, fillimisht për shkak të mungesës së avokatëve dhe së fundmi, përmes përpjekjes për përjashtimin e gjyqtares.
PD ndërkohë iu ka dërguar mesazh strukturave të saj, që në këtë orë të protestiojnë përpara selisë të SPAK.
Sekretari i Përgjithshëm i partisë, Flamur Noka iu dërgoi një mesazh pak ditë më parë strukturave të partisë, ku thuhej:
“Ju lutem të mobilizojmë të gjitha strukturat e degëve për të qenë të gjithë aty. Ora 08:30 para selisë së SKAP-it, faleminderit!”.
Ndaj ish-kryeministrit Berisha rëndon akuza e korrupsionit. Dhëndri i tij Jamarbër Malltezi (aktualisht në arrest shtëpie) si dhe biznesmeni Fatmir Bektashi akuzohen për korrupsion e pastrim parash ndërsa ndaj dy të tjerëve, ortaktut të Malltezit Xhimi Begeja dhe Andia Pustinës, financieres së kompanisë “Homeplan” rëndon akuza e pastrimit të parave.
Dosja 'Partizani', të pandehurit:
-Sali Berisha, ish kryeministër – akuzohet për “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim, me Jamarbër Malltezin parashikuar nga neni 260 e 25 i Kodit Penal.
- Jamarbër Malltezi – dhëndri i ish-kryeministrit – akuzohet për “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin e ish Kryeministrit, ka arritur të marrë përfitimet e parregullta! Akuzohet dhe për “Pastrimit të produkteve të veprës penale ose veprimtarisë kriminale”, parashikuar nga neni 287 paragrafi i dytë i Kodit Penal
- Fatmir Bektashi - Ndërtuesi akuzohet “Korrupsionit aktiv të funksionarëve të lartë shtetërorë”, parashikuar nga neni 245 i Kodit Penal dhe 'pastrim parash'
- Xhimi Begeja- Ortaku i Malltezit, trashëgimtar i tokës dhe bashkëpronar i 'Homeplan' akuzohet për 'Pastrim Parash'
- Andia Pustina - Financierja që kryente të gjitha operacionet financiare dhe ligjore të Homeplan sh.p.k - Akuzohet për 'Pastrim Parash'
Lini një Përgjigje