FLASH
Shkruar nga Pamfleti
Barcelona pritet të humbasë mesfushorin e talentuar Dro Fernandez, i cili gjatë këtij afati kalimtar do të largohet nga klubi.
Mesfushori 18-vjeçar spanjollo-filipinas kishte nisur të bënte përparim të dukshëm me ekipin e parë të Barcelonës këtë sezon, por ka vendosur që karrierën ta vazhdojë jashtë “Camp Nou”.
Sipas raportimeve të Sport dhe Mundo Deportivo, Dro do të largohet nga klubi në janar, pasi i ka njoftuar drejtuesit se do të aktivizojë klauzolën e lirimit në vlerë prej 6 milionë eurosh.
Fernandez iu bashkua akademisë së Barcelonës tre vite më parë dhe, ndonëse katalanasit do të përfitojnë financiarisht nga ky transferim, largimi i tij konsiderohet edhe një humbje e rëndësishme sportive për të ardhmen e klubit.
Ai kishte nisur të stërvitej me ekipin e parë gjatë fazës përgatitore, ndërsa trajneri Hansi Flick u impresionua mjaftueshëm për ta përfshirë në turneun parasezonal në Japoni dhe Korenë e Jugut.
Nga të gjithë talentët e La Masias që morën pjesë në këtë turne, Dro ishte lojtari që grumbulloi më së shumti minuta, duke arritur edhe të shënojë gol.
Flick kishte interes të vazhdueshëm për t’i dhënë hapësira mesfushorit të ri dhe, ndonëse ai ka kaluar më shumë kohë me ekipin U19 sesa me Barça Atlètic, ka regjistruar gjithsej 5 paraqitje me ekipin e parë këtë sezon.
Në këto paraqitje përfshihen edhe dy ndeshje si titullar ndaj Olympiakos dhe Real Sociedad, ku në ndeshjen e parë ka dhënë edhe një asist.
Drejtori sportiv Deco kishte tentuar të rinovonte kontratën e tij, e cila skadon pas vetëm 18 muajsh, por interesimi i disa klubeve për të aktivizuar klauzolën e lirimit e ka bërë të pamundur arritjen e marrëveshjes.
Edhe pse Dro Fernandez ende nuk ka vendosur se cilën ofertë do të pranojë, ai tashmë i ka bërë të ditur Barcelonës se do të largohet gjatë këtij afati kalimtar.
Lini një Përgjigje